Հայաստանում ՌԴ արտակարգ եւ լիազոր դեսպան Սերգեյ Կոպիրկինը հայտարարել է, որ Ադրբեջանում պահվող հայ ռազմագերիների վերադարձը ռուսական կողմի առաջնահերթ խնդիրներից է, որի ուղղությամբ ակտիվ աշխատանքներ են տարվում։
Կոպիրկինը շեշտել է, որ ակտիվ գործունեություն է ծավալում ռուսական խաղաղապահ զորակազմի նախկին հրամանատար գեներալ Ռուստամ Մուրադովը։ Նա նշել է, որ Մուրադովն այժմ Հարավային ռազմական օկրուգի հրամանատարի տեղակալն է, բայց շարունակում է աշխատել՝ երկու կողմերում իր ունեցած կապերը գործի դնելով։
ՌԴ դեսպանն ընդգծել է, որ գերիների հարցում ռուսական կողմի դիրքորոշումն ի սկզբանե եղել է «բոլորը բոլորի դիմաց» սկզբունքով փոխանակումը։
«Ցավոք, դա չստացվեց անել մեր ուզածի պես հեշտ ու արագ, բայց աշխատանքը շարունակվում է։ Շատ լավ հասկանում ենք խնդրի սոցիալ-հոգեբանական ամբողջ սրությունը, դրա կարեւորությունը գերիների ընտանիքների ու Ադրբեջանում պահվող անձանց համար»,- շեշտել է Կոպիրկինը:
ՌԴ դեսպանը նշել է նաեւ, որ հայ-դրբեջանական սահմանի իրավիճակը կարգավորելու նպատակով ռուսական կողմը մասնակցում է նաեւ սահմանազատման հանձնաժողովի ստեղծման աշխատանքներին։