Բելառուսի Բրեստի մարզում մեկնարկել են ռուս-ուկրաինական բանակցությունները: Ըստ ռուսական «ՌԻԱ Նովոստի» գործակալության՝ ռուսական եւ ուկրաինական պատվիրակությունների անդամները ողջունելիս միմյանց ձեռք են սեղմել:
Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը Թվիթերի իր էջում հայտնել է, որ սկսել են խոսել ռուս ներկայացուցիչների հետ: Բանակցությունների օրակարգում են հետևյալ հարցերը` անհապաղ կրակի դադարեցում, զինադադար, մարդասիրական միջանցքներ` ավերված կամ մշտապես ռմբակոծված գյուղերից ու քաղաքներից խաղաղ բնակիչներին դուրս բերելու համար:
ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, թե Մոսկվան հուսով է, որ Ռուսաստանի եւ Ուկրաինայի ներկայացուցիչների միջեւ բանակցությունները կհանգեցնեն իրադրության շուտափույթ կարգավորմանը, Դոնբասում խաղաղության վերականգնմանը, մարդկանց խաղաղ եւ արդար կյանքին վերադառնալուն:
ՌԴ նախագահի օգնական, ռուսական պատվիրակության ղեկավար Վլադիմիր Մեդինսկին ավելի վաղ հայտնել էր, որ ռուսական առաջարկները բաղկացած են 3 մասից՝ ռազմատեխնիկական, հումանիտար-միջազգային եւ քաղաքական:
Բանակցությունների առաջին փուլը տեղի է ունեցել փետրվարի 28-ին Բելառուսի Գոմելի մարզում։