ՌԴ նախագահ Վլադիմիր Պուտինը մարտի 3-ի ուշ երեկոյան անցկացված ՌԴ Անվտանգության խորհրդի նիստում հայտարարել է, որ Ուկրաինայում «Ռուսաստանի հատուկ ռազմական գործողությունն» ընթանում է ժամանակացույցին խիստ համապատասխան, իսկ առաջադրված բոլոր խնդիրները կատարվում են:
Պուտինը նշել է, որ ռուս զինծառայողները առանց բացառության բոլոր բախումների գոտիներում միջանցքներ են տրամադրել, ապահովել են տրանսպորտ, որպեսզի խաղաղ բնակիչները, օտարերկրյա քաղաքացիները հնարավորություն ունենան անվտանգ վայր մեկնելու:
«Կրկին ընդգծում եմ․ ազգայնականները թույլ չեն տալիս անել դա։ Ավելին, հիմա օտարերկրյա քաղաքացիները դիմում են իրենց իշխանություններին, իսկ նրանք արդեն իրենց հերթին պետք է դիմեն Ուկրաինայի ԱԳՆ-ին։ Փաստացի, մարդկանց ուղղակի կրակի տակ են շպրտում»,- ասել է ՌԴ առաջնորդը։
Գովասանքի խոսքեր շռայլելով Դոնբասում ծառայողական պարտքը կատարող ռուսաստանյան բոլոր էթնիկ խմբերի ներկայացուցիչների խիզախության մասին՝ Պուտինը շեշտել է, որ ինքը երբեք չի հրաժարվի այն համոզմունքից, որ ռուսներն ու ուկրաինացիները միեւնույն ազգն են:
ՌԴ նախագահը Անվտանգության խորհրդի նիստում անդրադարձել է զոհված կամ վիրավորված զինծառայողների ընտանիքների՝ օրենքով նախատեսված ապահովագրական վճարների եւ միանվագ նպաստների չափերին, ամսական եւ միանվագ դրամական փոխհատուցումներին: