Կիրակի օրը Բելառուսում շարունակվել են բողոքի ցույցերը, ձերբակալվել է շուրջ հարյուր հոգի: Ի պատասխան «քաղաքացիների կոլեկտիվ կոչի», որին միացել է 20 հազար մարդ՝ երկրի դատախազությունը մտադիր է արգելել Լուկաշենկոյի ռեժիմի դեմ պայքարի խորհրդանիշ դարձած սպիտակ-կարմիր-սպիտակ դրոշը՝ այն որակելով իբրեւ «ծայրահեղական»: Իրավապաշտպանների տվյալներով՝ ցույցի մասնակիցների նկատմամբ ավելի քան 650 քրեական գործ է հարուցվել։
Լեհաստանում վերսկսվել են հղիության արհեստական ընդհատումը գրեթե ամբողջապես արգելող օրենքի դեմ բողոքի ցույցերը, որի ժամանակ ոստիկանությունը արցունքաբեր գազ է կիրառել ցուցարաների դեմ: Ոչ պաշտոնական տվյալներով, երկրում տարեկան շուրջ 80-120 հազար հղիության արհեստական ընդհատման անօրինական գործողություններ են կատարվում:
Մյանմայում (նախկին՝ Բիրմա) ռազմական հեղաշրջում է տեղի ունեցել: Իշխող կուսակցությունը հայտնել է կառավարության փաստացի ղեկավար Աուն Սան Սու Չժիի ձերբակալման մասին: Երկրի զինված ուժերը մեկ տարով արտակարգ դրություն են հայտարարել՝ իշխանության ղեկը փոխանցելով գլխավոր հրամանատարին: Զինվորականներն անդրադարձել են նաեւ անցյալ տարվա ընտրությունների ժամանակ տեղի ունեցած կեղծիքին: Նրանք խորհրդարանականներին թույլ չեն տալիս հեռանալ մայրաքաղաք Նեյփիդոյի իրենց կեցավայրից: