Ըստ «Արմենպրես»-ի՝ իսպանացի կինոռեժիսոր Պակո Արանգոնի՝ արդեն 15 տարի Իսպանիայում քաղցկեղով հիվանդ երեխաներին աջակցող «Ալադինա» հիմնադրամը տարեվերջին 160 հազար դոլարի նվիրատվություն է արել «Սիթի Օֆ Սմայլ» («Ժպիտների քաղաք)» հիմնադրամին՝ ապահովելով շահառու երեխաների 2 ամսվա բուժման ծախսը:
«Սիթի Օֆ Սմայլն» աջակցում է քաղցկեղ, արյան հիվանդություններ ունեցող երեխաներին ու մինչեւ 25 տարեկան երիտասարդներին։
Հիմնադրամի տնօրեն Էսթեր Դեմիրճյանը նշել է, որ դա մեկ կազմակերպությունից ստացված ամենամեծ նվիրատվությունն է: Այս համագործակցությունը նա համարել է տարվա լավ սկիզբ՝ հույս հայտնելով, որ այլ կազմակերպություններ եւս կներգրավվեն:
Հիմնադրամի ամսական ծախսը մոտ 70-80 հազար դոլարին համարժեք դրամ է, տարեկան ծախսը՝ մոտ 1 մլն ԱՄՆ դոլարին համարժեք դրամ: Ընդհանուր առմամբ «Սիթի Օֆ Սմայլն»-ը առ այսօր օգնել է մոտ 370 երեխայի եւ երիտասարդի՝ 2.5 տարում այդ նպատակով հատկացնելով շուրջ 700 մլն դրամ:
Էսթեր Դեմիրճյանը հայտնել է նաեւ, որ այսօր Հայաստանում քաղցկեղ ունեցող երեխաների մոտ 70 տոկոսը լիովին առողջանում է: