Եգիպտոսի 22 փարավոնների, դրանց թվում՝ ամենահզոր հնագույն թագուհու՝ Հաշեփսութի մումիֆիկացված մնացորդները երթով անցան Կահիրեի փողոցներով՝ դեպի նոր հանգստավայր:
Կահիրեի կենտրոնում՝ Թահրիրի հրապարակում գործող Եգիպտոսի ազգային թանգարանում տասնամյակներ պահվող թագավորական մումիաները տեղափոխվեցին Ֆուստատի Եգիպտական քաղաքակրթության նոր ազգային թանգարան:
Սա բացառիկ պատմամշակութային իրադարձություն է ոչ միայն Եգիպտոսի, այլեւ ամբողջ աշխարհի համար:
Ըստ Ֆրանսպրես գործակալության՝ «Փարավոնների ոսկե շքերթը» համակարգում է Եգիպտոսի Զբոսաշրջության եւ հնությունների հարցերով նախարարությունը:
Շքերթի նպատակը Եգիպտոսի հարուստ եւ հնագույն հավաքածուների նկատմամբ բնակչության շրջանում հետաքրքրության բարձրացումն է, քանի որ զբոսաշրջությունը գրեթե ամբողջովին կանգ է առել COVID-19- ի հետ կապված սահմանափակումների պատճառով:
Երթին «մասնակցել են» XVII, XVIII, XIX եւ XX հարստությունների տասնութ փարավոն եւ չորս թագուհի, ներառյալ Հին Եգիպտոսի ամենահայտնի տիրակալներ Ռամզես II-ը, Սեթի I-ը, Թութմոս III-ը, ինչպես նաեւ թագուհի Հաշեփսութը, հին Եգիպտոսի պատմության ամենահզոր կին փարավոնը: Տաա II Սեկենենրան, որը թագավորել է հարավային Եգիպտոսում Քրիստոսից մոտ 1600 տարի առաջ, բացել է երթը, իսկ եզրափաել է Ռամզես IX- ը, որը թագավորել է մ.թ.ա. 12-րդ դարում:
Ամբողջ աշխարհի շուրջ 200 լրատվամիջոց ուղիղ եթերում լուսաբանել է պատմական այս եզակի իրադարձությունը:
Մումիաներով սարկոֆագները, որոնց տարիքը գերազանցում է 3 հազարը, տեղափոխվել են հատուկ կառքերով։ Յուրաքանչյուր կառք արտացոլում է իր փարավոնի դարաշրջանի ոճը, կառքերի վրա հիերոգլիֆներով գրված են տիրակալների անունները եւ կենսագրությունը:
Կառքերն ապահովված են այն ջերմաստիճանով եւ խոնավության աստիճանով, ինչ՝ Կահիրեի թանգարանում: Մումիաները շրջապատված են ազոտային թաղանթով, իսկ կառքերը՝ հագեցած բարձր նոսրացման մեխանիզմներով: Այլ կերպ ասած, Հին Եգիպտոսի էլիտայի ճանապարհը կթվա փափուկ, զով եւ հարմարավետ:
Կահիրեի Ամերիկյան համալսարանի եգիպտաբանության պրոֆեսոր Սալիմա Իքրամը Ֆրանսպրես գործակալությանն ասել է, որ Եգիպտական քաղաքակրթության նոր ազգային թանգարանում ջերմաստիճանի եւ խոնավության հսկողությունը ավելի լավ կլինի, քան երբեւէ: Կբարելավվի նաեւ մումիաների ցուցադրումը։ Այդ թանգարանում կցուցադրվեն Կահիրեի թանգարանի փարավոնների հավաքածուները, ներառյալ Թութանհամոն թագավորի հայտնի գանձարանը:
Պատրաստեց Գայանե Գասոյանը