Կիպրոսի նախագահ Նիկոս Անաստասիադիսն անդրադարձել է նախորդ շաբաթ Ժնեւում ՄԱԿ-ի, Մեծ Բրիտանիայի, Թուրքիայի եւ Հունաստանի երաշխավորությամբ Կիպրոսի հարցով տեղի ունեցած բանակցություններին:
Անաստասիադիսը շեշտել է, որ բանակցությունները դարձյալ փակուղի են մտել Թուրքիայի եւ Կիպրոսի թուրքական հատվածի առաջ քաշած լուծման տարբերակի պատճառով, ըստ որի՝ նրանք ցանկանում են հարցը լուծել կղզում երկու առանձին՝ թուրքական եւ հունական պետություններ ստեղծելու միջոցով:
Կիպրոսի նախագահն ընդգծել է՝ սա միջազգային իրավունքի բացահայտ խախտում է, եւ կիրառման ամենափոքր հավանականությունն անգամ չի կարող լինել՝ հավելելով, որ Թուրքիայի այս ցանկությունը մարտահրավեր է Կիպրոսի հույներին:
«Մենք հերթական անգամ ականատես եղանք Թուրքիայի ապակառուցողականությանն ու նոր Օսմանյան կայսրության երազողների հանդգնությանը: Ժնեւյան ոչ պաշտոնական գագաթնաժողովին Թուրքիան ու Կիպրոսի թուրքական ղեկավարներն իրենց հռետորաբանության պատճառով եւս մեկ պատմական հնարավորություն կորցրին»,- ասել է Կիպրոսի նախագահը:
Թուրքիայի իշխանությունները վերջին շրջանի իրենց հայտարարություններում մերժում են Կիպրոսի հարցը դաշնային կամ համատեղ պետություն ստեղծելու կամ մեկ այլ ճանապարհով լուծելու տարբերակները՝ առաջ քաշելով Կիպրոսում երկու առանձին պետություններ հիմնելու գաղափարը:
Հիշեցնենք, որ 1974-ին Թուրքիան կղզու թուրք փոքրամասնության «իրավունքների խախտումները կանխելու» պատրվակով զորք է մտցրել Կիպրոս՝ բռնազավթելով կղզու շուրջ 40 տոկոսը:
1983 թվականին կղզու թուրքական հատվածը ինքնահռչակվել է որպես Հյուսիսային Կիպրոսի Թուրքական Հանրապետություն, սակայն այդ պետությունը ճանաչված է միայն Թուրքիայի կողմից։
Միջազգային իրավունքի համաձայն՝ Կիպրոսը ինքնիշխան պետություն է՝ 1974-ին ունեցած ամբողջական տարածքով։
ՄԱԿ-ի Անվտանգության խորհրդի թիվ 541 որոշման համաձայն՝ Հյուսիսային Կիպրոսի Թուրքական Հանրապետությունը անօրինական է, իսկ թուրքական զինված ուժերը պետք է դուրս բերվեն կղզուց։