ՀՀ առողջապահության նախարարությունը հայտնել է, որ Հայաստանում ՄԱԿ-ի մշտական համակարգող Շոմբի Շարփը ստացել է պատվաստանյութի երկրորդ դեղաչափը։ «Ինձ շատ թեթեւացած եմ զգում: Այժմ լիովին պատվաստված եմ եւ որքան հնարավոր է պաշտպանված, հատկապես երբ աճում է Քովիդ-19-ի նոր տարբերակների թիվը, որոնց հանդեպ եւս պատվաստանյութերն արդյունավետ են։ Բոլորին խրախուսում եմ օր առաջ պատվաստվել հանուն բոլորիս համար ավելի անվտանգ եւ առողջ ապագայի։ Միայն միասին կարող ենք հաղթահարել կորոնավիրուսի համավարակը»,- ասել է Շարփը:
Հայաստանում հուլիսի 7-ի ժամը 11:00-ի դրությամբ հաստատվել է կորոնավիրուսային հիվանդության ընդհանուր 225801 դեպք, որոնցից 217303-ը՝ առողջացած, 4531-ը` մահվան ելքով: Կորոնավիրուսային հիվանդությունից այս պահին փաստացի բուժում է ստանում 2866 հիվանդ: Այսօր կան 53 առողջացած եւ 1 մահվան դեպք: Հուլիսի 7-ին կատարվել է 6086 թեստավորում, որից հաստատվել է կորոնավիրուսային հիվանդության 140 նոր դեպք: Ընդհանուր առմամբ, կատարվել է 1215373 թեստավորում:
Առողջապահության համաշխարհային կազմակերպությունն անցած շաբաթ աշխարհում արձանագրել է կորոնավիրուսով վարակման ավելի քան 2,68 միլիոն եւ գրեթե 54 հազար մահվան դեպք: