ՀՀ Անվտանգության խորհրդի քարտուղար Արմեն Գրիգորյանը նոյեմբերի 10-ի երեկոյան Հանրային հեռուստաընկերությանը տված հարցազրույցի ժամանակ հայտարարել է, որ Գորիս–Կապան ճանապարհին Ադրբեջանն այս գիշեր մաքսակետեր կտեղադրի։
Գրիգորյանը նշել է, որ ադրբեջանական կողմը հայկական կողմին տեղեկացրել է, որ գիշերը 12-ից սկսած՝ Գորիս-Կապան ճանապարհի հատվածում կիրականացնի սահմանային եւ մաքսային հսկողության գործառույթ, այսինքն՝ մաքսակետեր կտեղադրի։
«Հայկական կողմը եւս համապատասխան քայլեր կձեռնարկի, այսինքն՝ ճանապարհի այդ հատվածում կտեղադրի մաքսային եւ սահմանային հսկողության գործառույթներ իրականացնող կետեր»,– ասել է ԱԽ քարտուղարը։ Ըստ նրա` այդ աշխատանքները հայկական կողմը նախապես սկսել էր։
Նա անդրադարձել է նաեւ այլընտրանքային` Կապան-Տաթեւ ճանապարհին` ասելով, որ այն արդեն պատրաստ է և, կարելի է ասել, անվտանգ շահագործվող ճանապարհ է, որի միջոցով հնարավոր կլինի նաեւ բեռնափոխադրումներ իրականացնել։
Գրիգորյանը վստահեցրել է` Երեւան–Կապան ճանապարհը վերջին 15 տարվա ընթացքում կառուցված լավագույն ճանապարհն է։ Նա հավելել է, որ դեպի Շուռնուխ, Որոտան, Ճակատեն համայնքներ տանող ճանապարհները նույնպես բարեկարգվում են։