ԱՄՆ Սննդի եւ դեղերի գործակալության կողմից արտակարգ իրավիճակներում կիրառման թույլտվություն ստացած Քովիդ-19-ի դեմ պատվաստանյութերից ամենաարդյունավետը «Մոդեռնան» է:
«Մոդեռնա», «Պֆայզեր» եւ «Յանսեն» պատվաստանյութերի՝ Քովիդ-19-ի հետեւանքով հոսպիտալացումները կանխարգելելու արդյունավետությունը գնահատելու համար ԱՄՆ-ի CDC-ն գործընկերների հետ համատեղ 2021-ի մարտի 11-ից մինչեւ օգոստոսի 15-ը ԱՄՆ 18 նահանգների 21 հիվանդանոցում հոսպիտալացված 18 տարեկան եւ բարձր տարիքի 3689 անձանց շրջանում իրականացրել է դեպք-հսկողություն հետազոտություն։
ԱՄՆ 21 հիվանդանոցում անցկացված հետազոտությունների արդյունքների համաձայն՝ «Մոդեռնա» եւ «Պֆայզեր» ՌՆԹ պատվաստանյութերի երկու դեղաչափանոց սխեմաներն ապահովում են Քովիդ-19-ով պայմանավորված հոսպիտալացումների կանխարգելման բարձր արդյունավետություն՝ համապատասխանաբար կազմելով 93% եւ 88%, իսկ «Յանսեն» պատվաստանյութի արդյունավետությունը 71% է:
Թեւ տվյալները վկայում են պատվաստանյութի կողմից պաշտպանվածության մակարդակների որոշակի տատանումների մասին, այնուամենայնիվ, Սննդի եւ դեղերի գործակալության կողմից հաստատված Քովիդ-19-ի դեմ պատվաստանյութերը զգալի պաշտպանություն են ապահովում Քովիդ-19-ի հետեւանքով հոսպիտալացումից:
«Պֆայզեր» պատվաստանյութի արդյունավետությունը Քովիդ-19-ի հետեւանքով հոսպիտալացման կանխարգելման տեսանկյունից ավելի ցածր է, քան «Մոդեռնա» պատվաստանյութինը, որը կարող է պայմանավորված լինել «Մոդեռնա» պատվաստանյութում ՌՆԹ-ի ավելի բարձր պարունակությամբ, դեղաչափերի միջեւ ժամկետների (ինտերվալ) տարբերությամբ (3 շաբաթ «Պֆայզերի» եւ 4 շաբաթ «Մոդեռնայի» համար) կամ պատվաստումներում ընդգրկված խմբերի միջեւ հնարավոր տարբերություններով: