Շվեդիայի ԱԳՆ-ից հայտնել են, որ թագավորությունը 50 միլիոն շվեդական կրոն (շուրջ 5,5 միլիոն դոլար) կփոխանցի Ուկրաինայի հարավ-արեւելքի՝ Մեծ Բրիտանիայի, ԱՄՆ-ի, Կանադայի եւ Շվեյցարիայի համատեղ ջանքերով ստեղծված «կայունության ամրապնդման» ֆոնդին:
Համագործակցության գործերի նախարար Մատիլդա Էռնկրանսը հայտարարել է, որ 50 միլիոն շվեդական կրոն փոխանցելով «Կայուն Ուկրաինա» գործընկերային հիմնադրամին՝ Շվեդիան եւս մեկ անգամ ցույց է տալիս Ուկրաինայի հետ Շվեդիայի համերաշխությունը եւ հաստատուն աջակցությունը նրա ինքնիշխանությանն ու տարածքային ամբողջականությանը:
Նախարարը նշել է, որ հիմնադրամը կամրապնդի հարավ-արեւելքում ռուսական ագրեսիային դիմակայելու Ուկրաինայի կարողությունը՝ նպաստելով հանրային ծառայությունների որակի բարձրացմանը, երկխոսության ընդլայնմանը եւ ներառական տնտեսական զարգացմանը: Հիմնադրամը կհամալրի ՄԱԿ-ի կողմից ցուցաբերվող օժանդակությունը:
Շվեդիայի ԱԳՆ-ում հավելել են, որ Ուկրաինան Թագավորության կողմից Արեւելյան Եվրոպայում բարեփոխումների անցկացման համար հատկացվող օգնության խոշորագույն շահառուն է: Օգնությունը տարեկան շուրջ 240 միլիոն շվեդական կրոն (ավելի քան 25 միլիոն դոլար) է: