Ըստ «Սպուտնիկ Արմենիայի»՝ Հայաստանի դահուկավազքի ֆեդերացիայի նախագահ Գագիկ Սարգսյանը հայտնել է, որ Օլիմպիական խաղերում Հայաստանը ներկայացնող վեց մարզիկներից մեկը` լեռնադահուկորդ Հարություն Հարությունյանը, չի մեկնի Պեկին, քանի որ կորոնավիրուսի թեստը դրական է եղել։
Դրական է եղել նաեւ Հարություն Հարությունյանի մարզչի` Արսեն Ներսիսյանի թեստի պատասխանը։ Հայաստանի պատվիրակության կազմից կբացակայի նաեւ դահուկավազքի ֆեդերացիայի նախագահ Գագիկ Սարգսյանը, որը նույնպես կորոնավիրուսով է վարակվել։
Այսպիսով՝ Հայաստանն օլիմպիական խաղերում ներկայացնելու են դահուկորդներ Միքայել Միքայելյանը, Կատյա Գալստյանը, Անգելինա Մուրադյանը եւ գեղասահորդներ Թինա Կարապետյանն ու Սիմոն Սենեկալը:
Կրակի փոխանցումավազքի տեւողությունը կրճատվել է
Պեկինում ձմեռային oլիմպիական խաղերի կրակի փոխանցումավազքի մեկնարկը տրվել է Պեկինի հյուսիսում տեղակայված Օլիմպիական այգուց: Կորոնավիրուսի համավարակի պատճառով փոխանցումավազքի երթուղին եւ տեւողությունը զգալիորեն կրճատվել են: Երեք օր անց՝ ուրբաթ երեկոյան, վերջին ջահակիրը Պեկինի ազգային մարզադաշտում կվառի օլիմպիական ջահը:
Փոխանցումավազքի ընթացքում ավելի քան 1000 ջահակիրներ կրակը կտանեն Չինաստանի մայրաքաղաքի ամենահայտնի պատմամշակութային համալիրների, այդ թվում` Չինական մեծ պարսպի տարածքով:
Խաղերի բացման հանդիսավոր արարողությունը տեղի կունենա փետրվարի 4-ին: Ձմեռային օլիմպիական խաղերը կավարտվեն փետրվարի 20-ին: Մրցումները կանցկացվեն ինչպես նոր օբյեկտներում, այնպես էլ արդեն գոյություն ունեցող մրցասպարեզներում։ Կօգտագործվեն նաեւ այն կառույցները, որոնք մնացել են 2008 թվականի ամառային օլիմպիական խաղերից հետո։
Պեկինի oլիմպիական խաղերի կազմակերպիչները որոշել են մեղմել կորոնավիրուսային վարակի տարածման վտանգը։ Օլիմպիական խաղերի գլխավոր մեդիա կենտրոնի ճաշարանում սնունդ են մատուցում ռոբոտները, որոնք նաեւ հավաքում են սպասքը:
Չինաստանի մայրաքաղաքը դարձել է պատմության մեջ առաջին քաղաքը, որն ընդունում է ե՛ւ ամառային, ե՛ւ ձմեռային օլիմպիական խաղերը: