ՄԱԿ-ի գլխավոր ասամբլեան չորեքշաբթի` հատուկ նստաշրջանի ընթացքում, բանաձեւ է ընդունել` դատապարտելով Ուկրաինայում ՌԴ գործողությունները եւ պահանջելով, որ Ռուսաստանը դադարեցնի ռազմական գործողություններն ու դուրս բերի զորքերը:
Բանաձեւին կողմ է քվեարկել 141 պետություն, 5-ը՝ դեմ: Հայաստանը, Չինաստանը, Իրանը, Ղազախստանը, Ղրղզստանը, Պակիստանը, Տաջիկստանը, Կուբան, Հնդկաստանը եւ եւս 26 երկիր Ռուսաստանին դատապարտող բանաձեւին ձեռնպահ են քվեարկել (ընդհանուր՝ 35):
Թուրքիան բանաձեւին կողմ քվեարկած երկրների շարքում է: Ադրբեջանը եւ եւս 11 երկիր չեն մասնակցել քվեարկությանը: Բանաձեւին դեմ են քվեարկել Ռուսաստանը, Բելառուսը, Սիրիան, Հյուսիսային Կորեան եւ Էրիթրեան։
Նախկին ԽՍՀՄ երկրներից Ռուսաստանին դատապարտող բանաձեւին կողմ են քվեարկել Ուկրաինան, Վրաստանը, Մոլդովան, Էստոնիան, Լատվիան, Լիտվան:
Ի տարբերություն Անվտանգության խորհրդի բանաձեւերի՝ ՄԱԿ-ի գլխավոր ասամբլեայի համանման փաստաթղթերը չեն կարող հարկադրանքի միջոց դառնալ պետության նկատմամբ։ Այդօրինակ քայլեր կարող է սահմանել Անվտանգության խորհուրդը։
Ավելի վաղ Ռուսաստանը կառույցի Անվտանգության խորհրդում արգելափակել է նման բովանդակության մեկ այլ փաստաթուղթ:
Տեղեկանք
Էրիթրեա. պետություն Արեւելյան Աֆրիկայում՝ Կարմիր ծովի ափին: Հիմնականում երկրագործությամբ ու կիսաքոչվոր անասնապահությամբ զբաղվող Էրիթրեան շուրջ 20 տարի տեւած հյուծիչ քաղաքացիական պատերազմից հետո 1993-ին առանձնացել է Եթովպիայից: Ազգաբնակչությունը հիմնականում գյուղաբնակ է: