ՀՀ Անվտանգության խորհրդի քարտուղար Արմեն Գրիգորյանը հայտարարել է, որ Հայաստանի և Ադրբեջանի միջև սահմանազատման հարցերով երկկողմ հանձնաժողովի շուրջ քննարկումները շարունակվում են։
Գրիգորյանը նշել է նաեւ, թե չի տեսել, որ Ադրբեջանը հրապարակավ մերժի Հայաստանի 6-կետանոց առաջարկը։ Նա հիշեցրել է, որ Ադրբեջանի 5-կետանոց առաջարկին հաջորդել էր Հայաստանի 6-կետանոց պատասխանը։ Նա հավելել է, որ Հայաստանի համար Ադրբեջանի առաջարկած կետերն անընդունելի չեն եղել։
ԱԽ քարտուղարն ընդգծել է, որ Հայաստանն իր 6 կետերում առաջարկել է, որ Լեռնային Ղարաբաղի հիմնախնդրին եւս լուծում պետք է տրվի, որպեսզի հնարավոր լինի համապարփակ խաղաղություն ունենալ:
«Այս պահին մեր մոտեցումն այն է, որ այդ երկու փաթեթները՝ 5+6 կետերը, պետք է միացնել եւ սկսել խաղաղության պայմանագրի շուրջ բանակցությունները, որպեսզի գտնենք Լեռնային Ղարաբաղի հիմնախնդրի երկարաժամկետ լուծումը»,- ասել է Գրիգորյանը։
Ըստ ԱԽ քարտուղարի՝ Հայաստանը հայտարարել է, որ առաջնային է Արցախում բնակվող հայրենակիցների անվտանգության, պաշտպանության եւ իրավունքների հարցերին լուծումը գտնելը, եւ ըստ դրա պետք է ձեւավորվի Լեռնային Ղարաբաղի կարգավիճակը։
«Մեր քննարկումներում, որ այդ երկու փաթեթը պետք է միացնել եւ բանակցություններ սկսել, ըմբռնում կա։ Այդ ըմբռնումն ունեն ե՛ւ ադրբեջանական կողմը, ե՛ւ մնացած բոլոր միջազգային գործընկերները։ «5+6 կետերի» շուրջ բանակցություններ սկսելը լեգիտիմ մոտեցում է, եւ մենք տեսել ենք այդ ըմբռնումը»,- եզրափակել է Գրիգորյանը։
Հարաբերությունների կարգավորման Բաքվի առաջարկած հինգ սկզբունքները
Ադրբեջանը մարտի 14-ին Հայաստանին առաջարկել էր հարաբերությունների կարգավորման հետեւյալ սկզբունքները.
ինքնիշխանության, տարածքային ամբողջականության, միջազգային սահմանների անխախտելիության եւ միմյանց քաղաքական անկախության փոխադարձ ճանաչում,
միմյանց նկատմամբ պետությունների տարածքային պահանջների բացակայության փոխադարձ հաստատում եւ ապագայում նման պահանջներ չներկայացնելու իրավական պարտավորություն,
ձեռնպահ մնալ միջպետական հարաբերություններում միմյանց անվտանգությանը սպառնալուց, քաղաքական անկախության եւ տարածքային ամբողջականության դեմ սպառնալիքների եւ ուժի կիրառումից, ինչպես նաեւ ՄԱԿ–ի կանոնադրության նպատակների հետ անհամատեղելի այլ հանգամանքներից,
պետական սահմանի սահմանազատում եւ սահմանագծում, դիվանագիտական հարաբերությունների հաստատում,
տրանսպորտի եւ հաղորդակցությունների բացում, համապատասխան այլ հաղորդակցությունների հաստատում եւ համագործակցություն փոխադարձ հետաքրքրություն ներկայացնող այլ ոլորտներում։
Ադրբեջանական կողմը հավելել էր, որ պատրաստ է Հայաստանի հետ խաղաղության պայմանագիր կնքելու բանակցություններին, եթե պաշտոնական Երեւանն ընդունի այս 5 կետը։