Ալբանիայի մայրաքաղաք Տիրանայում հունիսի 5-ին ավարտվեց Եվրոպայի ծանրամարտի առաջնությունը։ 7-րդ անգամ Եվրոպայի չեմպիոն հռչակվեց աշխարհի հնգակի չեմպիոն, Օլիմպիական խաղերի կրկնակի չեմպիոն Լաշա Տալախաձեն։ Նա առաջին վարժությունում հաղթեց 217 կգ-ով։ Երկրորդ վարժությունում Տալախաձեն հաղթեց 245 կգ-ով՝ կատարելով միայն առաջին մոտեցումը։ Երկամարտի 462 կգ արդյունքով՝ վրացի ծանրամարտիկը դարձավ Եվրոպայի չեմպիոն։
Գերծանր քաշային կարգում Հայաստանը ներկայացնող գյումրեցի երկու մարզիկները երեկ նվաճեցին արծաթե եւ բրոնզե մեդալներ։ +109 կգ քաշայինների պայքարում աշխարհի փոխչեմպիոն, 22-ամյա Վարազդատ Լալայանը նվաճեց երկամարտի արծաթը (451 կգ), օլիմպիական փոխչեմպիոն Գոռ Մինասյանը՝ բրոնզե մեդալը (446 կգ)։
Լալայանը պոկում վարժությունում 211 կգ-ով գրավեց երկրորդ տեղը։ Հրում վարժությունում նա առաջին փորձի ժամանակ 240 կգ-ով գրավեց երկրորդ տեղը։ 25-ամյա Գոռ Մինասյանը պոկում վարժությունում երրորդն էր՝ 210 կգ-ով։ Գոռ Մինասյանը 236 կգ-ով գրավեց չորրորդ տեղը։
Հայաստանի ծանրամարտի հավաքականը Եվրոպայի առաջնությանը մասնակցեց 10 մարզիկով: Մեր հավաքականն այս մրցաշարում ունի 2 չեմպիոն եւ 3 փոխչեմպիոն։
Եվրոպայի առաջնության չեմպիոններ դարձան Ռաֆայել Հարությունյանը (81 կգ) եւ Դավիթ Հովհաննիսյանը (96 կգ):
Փոխչեմպիոնի կոչումը նվաճեցին Արա Աղանյանը (96 կգ), Սամվել Գասպարյանը (102 կգ) եւ Վարազդատ Լալայանը (109 + կգ):
Բրոնզե մեդալներին արժանացան Գոռ Մինասյանը (109 + կգ) եւ Արսեն Մարտիրոսյանը (109 կգ): «Փոքր» արծաթե մեդալ նվաճեց Անդրանիկ Կարապետյանը:
Ծանրամարտի Հայաստանի ընտրանին մեդալների հաշվարկով երրորդն է
Ծանրամարտի Եվրոպայի առաջնության երկամարտի մեդալների ոչ պաշտոնական հաշվարկում Հայաստանի ընտրանին երրորդն է (7 մեդալ): Առաջին տեղում Բուլղարիան է (8 մեդալ), երկրորդում` Ուկրաինան (7 մեդալ): Ուկրաինայի հավաքականը երկրորդն է, քանի որ ավելի շատ ոսկե մեդալներ է նվաճել: