Ըստ ամերիկյան Politico պարբերականի՝ նախագահ Ջո Բայդենի վարչակազմը պատրաստ չէ գնալու հակառուսական պատժամիջոցների մեղմացման Սեւ ծովով հացահատիկի արտահանումը վերսկսելու դիմաց:
Միացյալ Նահանգներն ուշադիր հետեւում է Սեւ ծովով հացահատիկի արտահանումը վերսկսելու շուրջ բանակցությունների ընթացքին, որ ՌԴ-ի հետ վարում են ՄԱԿ-ը եւ Թուրքիան:
ՄԱԿ-ի ոմն բարձրաստիճան ներկայացուցիչ նշել է, որ ԱՄՆ-ը չի համաձայնի Մոսկվայի նկատմամբ տնտեսական ճնշումը մեղմացնող գործարքին: Նա նշել է, որ հացահատիկի արտահանումը ՌԴ-ի նկատմամբ պատժամիջոցները հանելու հետ կապելը դժվարացնում է առանց այդ էլ փխրուն բանակցությունները:
ՌԴ նախագահ Վլադիմիր Պուտինն ավելի վաղ հերյուրանք է համարել պնդումները, թե Ռուսաստանը նավահանգիստներից դուրս չի թողնում ուկրաինական հացահատիկը: ՌԴ նախագահը հերքել է մեղադրանքները, թե Ռուսաստանը խոչընդոտում է ուկրաինական հացահատիկի արտահանումը:
Պուտինը պնդել է, թե աշխարհում տարեկան արտադրվում է մոտ 800 միլիոն տոննա ցորեն, մինչդեռ Ուկրաինան արտահանում է տարեկան 20 միլիոն տոննա. տոկոսային հարաբերությամբ դա չնչին է: