Մեծ Բրիտանիայի իշխող կուսակցության ավելի քան հինգ տասնյակ պատգամավորներ վարչապետ Բորիս Ջոնսոնին անվստահություն հայտնելու գործընթաց են սկսել: Պահպանողական կուսակցության խմբակցությունում հարցը քվեարկության կդրվի հունիսի 6-ի երեկոյան Համայնքների պալատում։
Ջոնսոնի կուսակիցների այդ նախաձեռնության պատճառը համաճարակի օրերին ծագած սկանդալն է, երբ պարզվել է, որ խիստ լոքդաունի պայմաններում վարչապետը մի քանի անգամ խախտել է կարգը եւ մասնակցել ընկերական երեկույթի: Արգելված հավաքույթները հիմնականում կազմակերպվել են Ջոնսոնի առանձնատանը։
Բրիտանիայի ոստիկանությունը դեռեւս 2022-ի հունվարի վերջում է սկսել հետաքննել մասնավորապես վարչապետի նստավայրում կորոնավիրուսային սահմանափակումների շրջանում լոքդաունի կանոնները խախտելու հանգամանքները: Ըստ մամուլի հրապարակումների՝ Ջոնսոնը խախտել է իր իսկ ստորագրությամբ սահմանված արգելքները եւ վարչապետի նստավայրում (Downing Street 10) ծննդյան օրվա կապակցությամբ հավաք է կազմակերպել:
Վարչապետի հրաժարականին հասնելու համար պահանջվում են խմբակցության անդամների մեծամասնության՝ առնվազն 180 պատգամավորների քվեները: