Ղազախստանի կենտրոնական ընտրական հանձնաժողովը հայտնել է, որ հունիսի 5-ին Ղազախստանում տեղի ունեցած սահմանադրական հանրաքվեի նախնական տվյալներով մասնակիցների 77,18%-ը կողմ է քվեարկել Ղազախստանի Սահմանադրության փոփոխությունների նախագծին։
Սահմանադրական փոփոխություններին դեմ է արտահայտվել հանրաքվեի մասնակիցների 18,66%-ը։ Անվավեր է ճանաչվել քվեաթերթիկների 2,58%-ը։ Անվավեր են ճանաչվել նաեւ երկու տարբերակ նշած քվեաթերթիկները՝ 1,58%։
Հանրաքվեին մասնակցել է Ղազախստանում ընտրելու իրավունք ունեցող քաղաքացիների 68,06%-ը։
Ընդհանուր առմամբ հանրաքվեի է դրվել Սահմանադրության 33 հոդվածներում 56 ուղղում, որոնք շարադրված են «Ղազախստանի Հանրապետության Սահմանադրության մեջ փոփոխություններ եւ լրացումներ կատարելու մասին» նախագծում:
Փոփոխությունները միտված են նախագահական լիազորությունների կրճատմանը, իշխանության այլ թեւերի ուժեղացմանը եւ պետության ղեկավարման գործում քաղաքացիների դերի բարձրացմանը:
Սահմանադրական փոփոխություններով Ղազախստանում կվերանա կառավարման «սուպերնախագահական» համակարգը, երկիրը կանցնի կառավարման նախագահական համակարգի՝ ուժեղ խորհրդարանով ու հաշվետու կառավարությամբ: Փոփոխություններով նաեւ արգելվում է երկրի ղեկավարի հարազատների կողմից պետական կառավարման համակարգում ղեկավար պաշտոնների նշանակելը: Երկրի ղեկավարը կառավարման ընթացքում չի կարողանա որեւէ կուսակցության անդամ լինել: Կստեղծվի Սահմանադրական դատարան, կամրագրվի մարդու իրավունքների պաշտպանի պաշտոնը, եւ ամբողջությամբ կարգելվի մահապատիժը։
Թարմացված Սահմանադրությամբ չեղարկվում են երկրի առաջին նախագահ Նուրսուլթան Նազարբաեւին տրված կարգավիճակն ու արտոնությունները: Նազարբաեւը զրկվել է առավելությունների մեծ մասից, որոնց թվում՝ «ազգի առաջնորդ»-ի կարգավիճակից։ Ի դեպ, Նազարբաեւն անձամբ աջակցել է փոփոխությունների անցկացմանը։
Ղազախստանի Սահմանադրության մեջ փոփոխությունների անցկացման հանրաքվեն ապրիլի վերջին նախաձեռնել էր Ղազախստանի նախագահ Կասիմ-Ժոմարտ Տոկաեւը։ Տոկաեւն ընդգծել է, որ սահմանադրական բարեփոխումներն ուղղված են ամբողջ պետական մոդելի համալիր վերափոխմանը: Մասնավորապես, փոփոխությունները միտված էին ամրագրելու Ղազախստանի անցումը «սուպերնախագահական» կառավարման ձեւից դեպի նախագահական կառավարման համակարգ, որտեղ ազդեցիկ դերակատարություն կունենա նաեւ խորհրդարանը։
Սահմանադրական փոփոխությունները հետեւանք են նաեւ հունվարյան արյունալի խռովությունների, որոնցով փաստացի ավարտվեց Ղազախստանի առաջին նախագահ Նուրսուլթան Նազարբաեւի երկարամյա իշխանությունը: