ԱԺ արտահերթ նիստում քննարկվել է Հայաստանի Հանրապետության քաղաքացիության մասին օրենքում փոփոխություններ եւ լրացումներ կատարելու մասին օրենքի նախագիծը:
Ըստ ՀՀ ոստիկանության պետի տեղակալ Արա Ֆիդանյանի՝ օրինագծի նպատակն է տնտեսության, գիտության, մշակույթի, առողջապահության, սպորտի ոլորտները զարգացնելու նպատակով ընդլայնել պարզեցված կարգով քաղաքացիություն ստացող այն անձանց շրջանակը, որոնք իրենց նշանակալի ավանդը կունենան մի շարք ոլորտներում:
Հիմնավորելով քննարկման հրատապությունը՝ փոխոստիկանապետը նշել է, որ բոլորին քաջ հայտնի պատճառներով այս տարվա ընթացքում՝ հատկապես վերջին երկու ամիսների ընթացքում, ահռելի մեծ ծավալների է հասել ՀՀ քաղաքացիություն, դրանց թվում՝ ՀՀ քաղաքացու անձնագիր եւ նույնականացման քարտ ստանալու համար դիմողների թիվը:
ՀՀ ոստիկանության պետի տեղակալը հայտնել է նաև, որ 2021-ի ընթացքում նույնականացման քարտ է ստացել 98 հազար 635 քաղաքացի, իսկ միայն 2022-ի առաջին կիսամյակում՝ 105 հազար 169 քաղաքացի: Ըստ փոխոստիկանապետի՝ 2021-ին բացառիկ ծառայությունների մատուցման համար քաղաքացիություն է ստացել 9, իսկ 2022-ի առաջին կիսամյակում՝ 14 անձ: