Կառավարությունն ընդունել է «Զինվորական ծառայության եւ զինծառայողի կարգավիճակի մասին» օրենքում փոփոխությունը, ըստ որի` կրթական տարկետում ունեցող ուսանողների զորակոչի տարիքը մեկ տարով կհետաձգվի:
ՀՀ կրթության, գիտության, մշակույթի եւ սպորտի նախարար Վահրամ Դումանյանը նշել է, որ դեռեւս խորհրդային շրջանից զորակոչի ենթակա էին 18-ը լրացած եւ մինչեւ 27 տարեկան արական սեռի քաղաքացիները:
Նախարարը հավելել է, որ կրթական տարկետում ստացած ՀՀ ուսանողները վերջին տարիներին լրջագույն խնդրի էին առնչվում: Ըստ նրա՝ խորհրդային տարիներին դպրոցը տասը տարի էր, եւ աշակերտները 17 տարեկանում ավարտում էին, հիմա 12-ամյա է, եւ ստացվում է, որ ասպիրանտը իր երրորդ տարվա ուսուցման շրջանում զորակոչվում է բանակ:
«Մենք առաջարկում ենք նշված կրթական տարկետում ունեցող ուսանողների զորակոչի տարիքը մեկ տարով հետաձգել` մինչեւ 28 տարեկան, եւ ուսանողը հանգիստ իր ասպիրանտուրան ավարտի եւ պաշտպանի թեկնածուական թեզը»,- շեշտել է Դումանյանը: