Հայ-վրացական սահմանին` Բագրատաշենի հատվածում, հայ-վրացական բարեկամության կամրջի գործարկման արարողության շրջանակում տեղի է ունեցել Հայաստանի եւ Վրաստանի վարչապետների առանձնազրույցը: Փաշինյանը եւ Ղարիբաշվիլին կարեւորել են կամրջի գործարկումը եւ ընդգծել դրա դերը երկկողմ տրանսպորտային հոսքերն առավել դյուրին դարձնելու գործում:
Իրակլի Ղարիբաշվիլին ցավակցություն է հայտնել Նիկոլ Փաշինյանին Երեւանում տեղի ունեցած ողբերգության կապակցությամբ։
Դեմ առ դեմ հանդիպմանը Վրաստանի եւ Հայաստանի վարչապետները քննարկել են երկու երկրների միջեւ համագործակցության օրակարգի հիմնական հարցերը։ Կողմերը նշել են, որ բարձրաստիճան ինտենսիվ շփումները վկայում են հայ-վրացական հարաբերությունների դինամիկ զարգացման եւ քաղաքական երկխոսության բարձր մակարդակի մասին:
Հանդիպմանը նշվել են նաեւ Վրաստանի կարեւոր դերն ու ջանքերը տարածաշրջանում խաղաղության եւ կայունության հաստատման գործում, այդ թվում՝ Թբիլիսիում Հայաստանի եւ Ադրբեջանի արտգործնախարարների հանդիպման կազմակերպման հարցում։
Զրուցակիցները քննարկել են Հայաստան-Վրաստան համագործակցության օրակարգային հարցեր, մտքեր են փոխանակել տարածաշրջանային զարգացումների շուրջ: Երկուստեք վերահաստատվել է բարեկամական կապերը հետեւողականորեն խորացնելու եւ ակտիվ երկխոսությունը շարունակելու պատրաստակամությունը։