Երեւանի քաղաքապետարանը որոշում է ընդունել սեպտեմբերի 25-ին Ստեփանակերտ-Ասկերան ավտոճանապարհի հարակից տարածքում բենզինի պահեստում պայթյունի հետեւանքով մահացածների ընտանիքներին հատկացնել 200-հազարական դրամ: Դրա մասին հայտնել է «Փաստ» օրաթերթը:
Իսկ թե ինչպես եւ երբվանից է քաղաքապետարանը սկսելու տրամադրել այդ գումարը, ըստ աղբյուրի, պարզ կլինի առաջիկա օրերին:
Նախնական տվյալներով՝ բենզինի պահեստում պայթյունի հետեւանքով զոհվել է մոտ 220 մարդ: Արցախի բուժհաստատություններից Հայաստան էր տեղափոխվել 349 բուժառու, որոնց մեծ մասը` ծանր եւ ծայրահեղ ծանր վիճակում։ Արցախի ՆԳՆ խոսնակ Հունան Թադեւոսյանը ավելի վաղ հայտնել էր, որ մահացածների աճյունները եւ մասունքները պայթյունի տարածքից հանվել եւ տեղափոխվել են Երեւանի դատաբժշկական փորձաքննության կենտրոն՝ ԴՆԹ թեստի միջոցով նույնականացում իրականացնելու համար։ Ըստ նրա՝ կան նաեւ 50-ից ավելի անհայտ կորածներ։
Նշվում է, որ Քննչական կոմիտեն, որտեղ պայթյունի գործով քննություն է ընթանում, մահացածների թվի վերաբերյալ կոնկրետ թիվ չի հրապարակել՝ օրեր առաջ լրատվամիջոցներին պարզաբանելով, թե «պատկերն անընդհատ փոխվում է»: