Եմենի «Անսար Ալլահ» շարժման հութի ապստամբները հականավային հրթիռով հարվածել են նորվեգական «Ստրինդա» նավին: Նորվեգական լցանավը, նավթի խմբաքանակ բարձած, մեկնում էր Իսրայել։ Վերջին երկու օրվա ընթացքում Եմենի զինված ուժերին հաջողվել է կանգեցնել Իսրայելի ափեր շարժվող մի քանի նավերի։
Եմենի բրիգադային գեներալ Յահյա Սարին մեկնաբանել է նորվեգական լցանավի վրա հարձակումը եւ վստահություն հայտնել, որ տեսանելի ապագայում Իսրայելի բոլոր նավահանգիստները կկանգնեցվեն:
«Մենք չհարձակվեցինք նավթով բեռնված նորվեգական նավի վրա, քանի դեռ նրա անձնակազմը չէր մերժել բոլոր նախազգուշական ազդանշանները»,- ասել է գեներալը։ Նա հավելել է, որ Եմենի զինված ուժերը չեն վարանի հարված հասցնել ցանկացած նավի, որը կփորձի օգնություն հասցնել Իսրայելին։
Գեներալը զգուշացրել է, որ Եմենի զինված ուժերը կշարունակեն խոչընդոտել Արաբական եւ Կարմիր ծովերով Իսրայելի նավահանգիստներ մեկնող բոլոր պետությունների նավերին: