Ռուսաստանի պաշտպանության նախարարությունը օգոստոսի 8-ի հայտարարության մեջ հայտնել է, որ ռուս զինվորականները շարունակում են ռազմական գործողությունները Կուրսկի շրջանում ուկրաինական բանակի առաջխաղացումը կասեցնելու համր։
Նախարարությունը հայտնում է, որ «Հյուսիս» զորքերի խմբի ստորաբաժանումները Անվտանգության դաշնային ծառայության ստորաբաժանումների հետ «շարունակում են ոչնչացնել Ուկրաինայի զինված ուժերի կազմավորումները Կուրսկի շրջանի Սուդժանսկի և Կորենևսկի շրջաններում՝ ռուս-ուկրաինական սահմանի անմիջական հարևանությամբ»։
Հաղորդագրության մեջ նաեւ ավելացվում է, որ «կրակային հարվածներ են հասցվում Ուկրաինայի զինված ուժերի կենդանի ուժի և տեխնիկայի հայտնաբերված կենտրոնացմանը։ Կուրսկի ուղղությամբ առանձին ստորաբաժանումների կողմից տարածք ներթափանցելու փորձերը կասեցվում են»։
ՌԴ ՊՆ-ն պնդում է, որ ուկրաինական զինված ուժերին օրվա ընթացքում թույլ չի տրվել առաջխաղացում կատարել։
Բացի այդ, նախարարությունը հավելել է, որ օդային հարվածներ են հասցվում Սումիի շրջանում Ուկրաինայի զինված ուժերի ռեզերվներին։
Ռուսական կողմը պնդում է, որ մեկ օրում ուկրաինական զինված ուժերը կորցրել են մինչև 400 զինվորական և 32 զրահամեքենա, այդ թվում՝ մեկ տանկ, իսկ ընդհանուր առմամբ Կուրսկի ուղղությամբ ռազմական գործողությունների սկզբից ի վեր ուկրաինական բանակը կորցրել է 660 զինծառայող և 82 զրահամեքենա, այդ թվում՝ ութ տանկ։
Ռուսաստանի գլխավոր շտաբի պետ Վալերի Գերասիմովն ավելի վաղ հայտնել էր, որ օգոստոսի 6-ին Ուկրաինայի զինված ուժերի ստորաբաժանումները հարձակման են անցել՝ նպատակ ունենալով գրավել Կուրսկի շրջանի Սուջանսկի շրջանի տարածքի մի հատվածը։ «Գործողությունը կավարտվի հակառակորդին ջախջախելով և հասնելով պետական սահման»,- հայտարարել էր Գերասիմովը նախօրեին։
Կուրսկի մարզում արտակարգ դրություն է մտցվել։
Ուկրաինայի իշխանությունները չեն մեկնաբանում այն Կուրսկի մարզում իրականացվող հարձակողական գործողությունները։