Ռուսաստանն ու Չինաստանը ծրագրում են սկսել բարտերային առեւտուրը՝ այդպիսով փորձելով սահմանափակել ԱՄՆ-ի կողմից վերահսկվող բանկային համակարգերի օգտագործումը, գրում է Reuters-ը՝ վկայակոչելով երեք աղբյուրների։
Նշենք, որ Բարտերը դա փոխանակման համակարգ է առեւտրի ոլորտում, որով գործարքի մասնակիցները ուղղակիորեն փոխանակում են ապրանքներ կամ ծառայություններ այլ ապրանքների կամ ծառայությունների համար՝ որպես փոխանակամն միջոց չօգտագործելով արժույթը։
ԱՄՆ-ի պատժամիջոցների պատճառով Ռուսաստանի եւ Չինաստանի միջեւ վճարումների երկկողմանի ուշացումներից հետո ի հայտ են եկել արեւմտյան բանկային համակարգերը շրջանցող լուծման ուղիներ՝ չինական փոքր տարածաշրջանային բանկերի տեսքով , սակայն վճարման խնդիրները դեռեւս պահպանվում են:
Բարտերային առեւտուրը Մոսկվային եւ Պեկինին թույլ կտա նվազեցնել արեւմտյան կարգավորիչների համար երկկողմ գործարքների թափանցիկությունը եւ սահմանափակել արժութային ռիսկերը, նշում է գործակալությունը։
Ըստ Reuters-ի աղբյուրների, այս աշնանը սպասվում է երկու բարտերային գործարք՝ կապված գյուղատնտեսության հետ։ Բարտերային սխեմայի պատրաստման մասին հայտարարել է ռուսական խոշոր բանկի թոփ-մենեջերը, որը հրաժարվել է մանրամասներ հայտնել։ Ռուսական արդյունաբերական ընկերություններից մեկի զրուցակիցն էլ ասել է, որ քննարկվում է Ռուսաստանից մետաղների արտահանման հարցը՝ Չինաստանից սարքավորումների ստացման դիմաց։
Բարտերային առեւտուրը, ըստ Ռուսաստանի կառավարության աղբյուրի, ելքեր է առաջարկում խնդրահարույց իրավիճակից՝ ինչպես պատժամիջոցների տակ հայտնված, այնպես էլ քաղաքացիական ապրանքների համար վճարումների հետ կապված: Նրա խոսքով՝ այս ոլորտում հեռանկարները չեն բարելավվել նույնիսկ Վլադիմիր Պուտինի՝ 2024 թվականի մայիսին Չինաստան կատարած այցից հետո։
Reuters-ի զրուցակիցները ավանդական վճարային սխեմաների թափանցիկությունն անվանում են սահմանափակող գործոն չին-ռուսական երկկողմ առեւտրի համար։ Բացի այդ, Ռուսաստանն ու Չինաստանը ուղիղ վճարման մեխանիզմ չունեն։ Պատժամիջոցների տակ չհայտնված բանկերի համար SWIFT-ը մնում է որպես միակ տարբերակ, որը ըստ աղբյուրներից մեկի, «միջազգային բանկային համակարգ է, որը լիովին թափանցիկ է, այդ թվում՝ ամերիկացիների համար»:
Reuters-ը նշում է, որ Ռուսաստանի եւ Չինաստանի միջեւ առեւտրի պատմության մեջ եղել են բարտերային գործարքներ. 2019 թվականին Պեկինը համաձայնել է փոխանակել Մալազիայից մոտ 150 միլիոն դոլար արժողությամբ արմավենու յուղը՝ շինարարական ծառայությունների, բնական ռեսուրսների արտադրանքի եւ քաղաքացիական եւ պաշտպանական սարքավորումների դիմաց: