ՄԱԿ-ի գլխավոր քարտուղար Անտոնիո Գուտերեշը Գլխավոր վեհաժողովի շրջանակում Ռուսաստանի արտգործնախարար Սերգեյ Լավրովի հետ հանդիպմանը հայտնել է Կազանում հոկտեմբերի 22-24-ը սպասվող BRICS-ի գագաթնաժողովին մասնակցելու իր մտադրության մասին։ Այս մասին TACC-ին հայտնել է ՌԴ արտգործնախարարության պաշտոնական ներկայացուցիչ Մարիա Զախարովան։
«Այո, նա խոսել է իր մտադրության մասին ՄԱԿ-ի Գլխավոր վեհաժողովի շրջանակում Սերգեյ Վիկտորովիչ Լավրովի հետ հանդիպման ժամանակ»,- ասել է Զախարովան՝ պատասխանելով համապատասխան հարցին։
Ավելի վաղ ՌԴ փոխարտգործնախարար Սերգեյ Վերշինինը կարծիք էր հայտնել, որ Գուտերեշի համար BRICS-ի գագաթնաժողովին մասնակցությունը «հետաքրքիր շփում կլինի միջազգային հարաբերություններում ուժի մի բեւեռի հետ, որը նկատելի հեղինակություն է ձեռք բերում»։
Գուտերեշի պաշտոնական ներկայացուցիչ Ստեֆան Դյուժարիկը հաստատել է, որ ՄԱԿ-ը արդեն տեղյակ է Կազանում կայանալիք BRICS-ի գագաթնաժողովին գլխավոր քարտուղարի հրավերի մասին, սակայն դեռ պատրաստ չէ խոսելու դրա ժամանակացույցի մասին։