Ռուսաստանի նախագահ Վլադիմիր Պուտինի եւ ԱՄՆ նորընտիր նախագահ Դոնալդ Թրամփի ենթադրյալ հեռախոսազրույցի մասին արտասահմանյան մամուլի հաղորդագրությունները կեղծ են, նման խոսակցություն տեղի չի ունեցել։ Այս մասին ճեպազրույցի ժամանակ հայտարարել է ՌԴ նախագահի մամուլի քարտուղար Դմիտրի Պեսկովը։
«Խոսակցություն չի եղել։ Սա տեղեկատվության որակի ամենավառ օրինակն է, որն այժմ երբեմն հրապարակվում է նույնիսկ բավականին հեղինակավոր պարբերականների կողմից: Սա բացարձակապես չի համապատասխանում իրականությանը: Սա մաքուր մտացածին եւ ուղղակի սուտ տեղեկություն է»,- ասել Պեսկովը։
Հիշեցնենք, որ նոյեմբերի 10-ին Թրամփի եւ Պուտինի հեռախոսազրույցի մասին հայտնել է The Washington Post-ը։ Ըստ պարբերականի՝ զրույցը տեղի է ունեցել նոյեմբերի 7-ին։ Թերթի զրուցակիցները պնդում են, որ Թրամփը Պուտինին հորդորել է «չսրել Ուկրաինայում ընթացող պատերազմը» եւ հիշեցրել է Եվրոպայում ԱՄՆ զինված ուժերի «զգալի ներկայության» մասին։
Ինչպես հայտնում է The Washington Post-ը, Ուկրաինայի իշխանությունները տեղյակ են եղել Պուտինի եւ Թրամփի զանգի մասին եւ առարկություններ չեն ներկայացրել։
Սակայն արդեն այսօր հեռախոսազրույցից Կիեւի տեղեկացվածության մասին հաղորդումը Reuters-ի հետ զրույցում հերքել էր Ուկրաինայի արտգործնախարարության խոսնակ Գեորգի Տիխին՝ նշելով, որ Ուկրաինան չէր կարող հավանություն տալ կամ դեմ լինել այդ հեռախոսազրույցին։
Ուկրաինայի նախագահ Վլադիմիր Զելենսկին բազմիցս է հայտարարել է, որ Մոսկվայի հետ ուղղակի խաղաղ բանակցություններն առանց Կիեւի մասնակցության անհնար են։ Սպիտակ տան ներկայիս վարչակազմը նույնպես պնդում էր, որ խաղաղ բանակցությունների վերաբերյալ որոշումը պետք է նախաձեռնվի Կիեւից։