Բելառուսը պաշտոնապես դարձել է BRICS միջպետական տնտեսական համագործակցության ասոցիացիայի գործընկեր, այս մասին TACC-ին հայտնել են հանրապետության արտաքին գործերի նախարարության մամուլի ծառայությունից։
Գերատեսչության տվյալներով՝ նոյեմբերի 5-ին Բելառուսի նախագահ Ալեքսանդր Լուկաշենկոն նամակ է հղել Ռուսաստանի Դաշնության նախագահ Վլադիմիր Պուտինին՝ նշելով BRICS-ին որպես գործընկեր միանալու հանրապետության պատրաստակամության մասին:
Հաղորդվում է, որ անձնական հանդիպման ժամանակ փաստաթուղթը Բելառուսի արտաքին գործերի նախարար Մաքսիմ Ռիժենկովը փոխանցել է Մինսկում ՌԴ դեսպան Բորիս Գրիզլովին։
«Գրավոր հրավերին պաշտոնական պատասխանը անդամ պետությունների կողմից համաձայնեցված գործընկերոջ կարգավիճակ ստանալու ընթացակարգի պարտադիր տարրն է, այս պահից է, որ երկիրը պաշտոնապես համարվում է BRICS-ի գործընկեր»,- հայտնել են նախարարությունից։
Լուկաշենկոն շնորհակալություն է հայտնել Պուտինին աջակցության համար եւ «առանձնահատուկ գոհունակությամբ նշել, որ Բելառուսի մասնակցությունը BRICS-ին որպես գործընկեր ձեւակերպվում է հենց Ռուսաստանի նախագահության շրջանում», հաղորդում է ԱԳՆ-ն։
Ինչպես պարզաբանել է դիվանագիտական գերատեսչությունը, գործընկեր երկրի կարգավիճակը, ի թիվս այլ բաների, նախատեսում է շարունակական մասնակցություն գագաթնաժողովների եւ BRICS-ի արտգործնախարարների հանդիպումների հատուկ նիստերին:
Գործընկերները կարող են միանալ BRICS-ի վերջնական փաստաթղթերին՝ դրանով իսկ ընդլայնելով վերջինիս աշխարհագրական ընդգրկումը եւ ամրապնդելով ասոցիացիայի ձայնը միջազգային հարցերում: