Մեծ Բրիտանիայի վարչապետ Քիր Սթարմերը եւ Ֆրանսիայի նախագահ Էմանուել Մակրոնը կփորձեն համոզել ԱՄՆ նախագահ Ջո Բայդենին Ուկրաինային թույլ տալ հարվածներ հասցնել Ռուսաստանի խորքերում տեղակայված թիրախներին՝ օգտագործելով ֆրանս-բրիտանական համատեղ արտադրության Storm Shadow հրթիռները։ Այս մասին նոյեմբերի 10-ին գրել է Telegraph թերթը՝ վկայակոչելով բրիտանական կառավարության աղբյուրներին։
«Սպասվում է, որ Քիր Սթարմերը եւ Էմանուել Մակրոնը վերջին ջանքերը կգործադրեն՝ Ուկրաինային տրամադրվող ԱՄՆ աջակցությունը կրճատելու՝ Դոնալդ Թրամփի ջանքերը խափանելու համար»,- գրել է թերթը։
Մեծ Բրիտանիայի եւ Ֆրանսիայի ղեկավարները թեման կքննարկեն Փարիզում, ուր Սթարմերը կժամանի նոյեմբերի 11-ին՝ Առաջին համաշխարհային պատերազմի ավարտին նվիրված արարողությանը մասնակցելու համար։
Ըստ թերթի՝ պաշտոնական Լոնդոնը հուսով է, որ Բայդենը «վերջապես կտա այն թույլտվությունը, որը Կիեւը փնտրում էր արդեն մի քանի ամիս»։
Ակնկալվում է, որ երկու երկրների ղեկավարները կքննարկեն նաեւ Դոնալդ Թրամփի՝ նախագահ ընտրվելու հավանական ազդեցությունը Մերձավոր Արեւելքում ընթացող հակամարտության վրա։ Նշվում է, որ խոսակցության թեման կներառի նաեւ «ԱՄՆ-ի եւ Եվրոպայի միջեւ հնարավոր առեւտրային պատերազմի» հարցը։
Նշենք, որ արդեն մի քանի ամիս է, ինչ Ուկրաինայի նախագահ Վլադիմիր Զելենսկին փորձում է արեւմտյան դաշնակիցներին համոզել ՌԴ տարածքի խորքում տեղակայված թիրախներին հարվածելու թույլտվություն ստանալու համար։ Մեծ Բրիտանիան եւ Ֆրանսիան, ըստ The Telegraph-ի աղբյուրների, նախկինում աջակցել են Զելենսկուն այս հարցում, սակայն ԱՄՆ-ը դեմ է եղել դրան։ Վաշինգտոնը մտավախություն ունի, որ նման դեպքում Ռուսաստանը կպատասխանի՝ հարվածներ հասցնելով արեւմտյան ռազմաբազաներին։
Եթե արեւմտյան երկրները թույլ տան Ուկրաինային հարվածներ հասցնել Ռուսաստանի տարածքին մինչեւ 2025 թվականի հունվարի 20-ը՝ ԱՄՆ նախագահի պաշտոնում Դոնալդ Թրամփի պաշտոնավարման մեկնարկը, ապա նման որոշումը չեղարկելը շատ ավելի դժվար կլինի, նշում է The Telegraph-ը։