Սաուդյան Արաբիան միջազգային հանրությանը կոչ է անում դադարեցնել Իսրայելի «ագրեսիան Գազայի հատվածի եւ Լիբանանի դեմ» եւ ճնշում գործադրել հրեական պետության վրա՝ Իրանի ինքնիշխանությունը հարգելու համար: Այս մասին հայտարարել է թագավորության թագաժառանգ եւ վարչապետ Մուհամեդ բեն Սալման Ալ-Սաուդը։
«Մենք կոչ ենք անում միջազգային հանրությանը ոտքի կանգնել միջազգային խաղաղությունն ու անվտանգությունը պահպանելու համար եւ աջակցել Գազայի հատվածում եւ Լիբանանում մեր եղբայրների վրա Իսրայելի հարձակումները անհապաղ դադարեցնելու կոչերին, ինչպես նաեւ պարտավորեցնել Իսրայելին հարգել եղբայրական Իրանի Իսլամական Հանրապետության ինքնիշխանությունը»,- հայտարարել է թագաժառանգը Ալ-Ռիադում Արաբական պետությունների լիգայի (ԱՊԼ) եւ Իսլամական համագործակցության կազմակերպության (ԻՀԿ) արտահերթ գագաթնաժողովի բացման ժամանակ։ Նա նաեւ ընդգծել է, որ Թագավորությունը դատապարտում է Իսրայելի հարձակումները Գազայի հատվածի եւ Լիբանանի վրա։
Նման հայտարարությունը 2022 թվականին Պեկինում Իրանի եւ Սաուդյան Արաբիայի միջեւ միջպետական հարաբերությունները կարգավորելուց հետո երկու տարածաշրջանային, աշխարհաքաղաքական ու գաղափարական երբեմնի ախոյանների միջեւ հարաբերությունների ջերմացման լուրջ դրսեւորում է։
Հիշեցնենք, որ Ալ-Ռիադը եւ Թեհրանը դիվանագիտական հարաբերությունները խզել էին 2016-ին՝ Սաուդյան Արաբիայում շիա քարոզիչ Նիմր ալ-Նիմրին մահապատժի ենթարկելուց եւ Թեհրանում Թագավորության դեսպանատան վրա հարձակումներից հետո։
Սաուդյան Արաբիայի մայրաքաղաքում ընթանում է ԱՊԼ-ի եւ ԻՀԿ-ի մասնակից երկրների երկրորդ արտահերթ գագաթնաժողովը՝ նվիրված Մերձավոր Արեւելքում տիրող իրավիճակին։ Հանդիպման մասնակիցները միասնական դիրքորոշում կմշակեն Գազայի հատվածի եւ Լիբանանի հակամարտությունների վերաբերյալ, կքննարկեն խաղաղ բնակիչներին պաշտպանելու եւ աջակցելու ուղիները, ինչպես նաեւ կփորձեն ճնշում գործադրել միջազգային հանրության վրա Իսրայելի գործողությունները դադարեցնելու համար: