Հայաստանի արագ զինումը մինչեւ հիմա սպառնալիք է տարածաշրջանի համար, որի մասին վկայում են վերջին օրերի իրադարձությունները։ Այսպիսի հայտարարություն այսօր արել է Ադրբեջանի արտգործնախարար Ջեյհուն Բայրամովը Եվրոպական միության արտաքին գործերի եւ անվտանգության քաղաքականության հարցերով բարձր ներկայացուցիչ, Եվրոպական հանձնաժողովի փոխնախագահ Կայա Կալլասի հետ համատեղ մամուլի ասուլիսի ժամանակ։
Ըստ Բայրամովի՝ Բաքվում ակնկալում են, որ Հայաստանը համապատասխան քայլեր կձեռնարկի «Սահմանադրությամբ ամրագրված Ադրբեջանի նկատմամբ տարածքային պահանջները վերացնելու» եւ ԵԱՀԿ Մինսկի խումբը լուծարելու համար։
Ադրբեջանի արտգործնախարարն իր խոսքում նաեւ նշել է, որ Երեւանում ապրիլի 23-ին տեղի ունեցած ջահերով երթի ժամանակ հնչել են Ադրբեջանի եւ Թուրքիայի հանդեպ ատելության կոչեր, եւ տեղի են ունեցել «բացարձակապես անընդունելի գործողություններ»։
Բայրամովի խոսքերով՝ Ադրբեջանի եւ Թուրքիայի դրոշների այրումը մտահոգության առարկա է, որը տեղի է ունեցել ոչ միայն Երեւանում, այլ նաեւ Փարիզում։
«Մենք ակնկալում ենք, որ այդ երկրների իշխանությունները եւ համապատասխան կառույցները նման սադրիչ գործողությունները կդիտարկեն որպես հանցավոր գործողություններ եւ լուրջ միջոցներ կձեռնարկեն դրանք կանխելու համար»,- նշել է Բայրամովը։