Ադրբեջանը հուսալի գործընկեր է Եվրոպայի էներգետիկ անվտանգության ապահովման գործում։ Այդ մասին հայտարարել է Եվրոպական միության արտաքին գործերի եւ անվտանգության քաղաքականության հարցերով բարձր ներկայացուցիչ, Եվրոպական հանձնաժողովի փոխնախագահ Կայա Կալլասը Ադրբեջանի նախագահ Իլհամ Ալիեւի հետ Բաքվում կայացած հանդիպման ժամանակ։
Ադրբեջանական կողմի հաղորդմամբ՝ Կալլասը, նաեւ անդրադառնալով տրանսպորտային կապերի թեմային, նշել է, որ Ադրբեջանը կարեւոր դեր ունի եւ կարեւոր տարածաշրջանային պետություն է, որը գտնվում է նշանակալի աշխարհաքաղաքական տարածքում։
Ալիեւն էլ իր հերթին է նշել, որ Ադրբեջանը Եվրամիության հուսալի գործընկեր է եւ արդեն 4 տարի է, ինչ Հարավային գազային միջանցքի շնորհիվ մատակարարումներ է կատարում 10 եվրոպական երկրների, որոնցից 8-ը ԵՄ անդամ են։
Նշվում է նաեւ, որ զրույցի ընթացքում կողմերը մտքեր են փոխանակել Հարավային Կովկասում երկարատեւ կայունության ապահովման հարցերի շուրջ։
Ալիեւը նաեւ հայտարարել է, որ Հայաստանի եւ Ադրբեջանի միջեւ երկկողմանի հիմքով քայլեր են ձեռնարկվում, եւ քննարկումներ են ընթանում հարաբերությունները կարգավորելու ուղղությամբ։