ԱՄՆ նախագահ Դոնալդ Թրամփը եւ Ուկրաինայի նախագահ Վլադիմիր Զելենսկին ապրիլի 26-ի առավոտյան Վատիկանում կարճատեւ երկկողմ հանդիպում են անցկացրել։ Այս մասին տեղեկացնում է Ուկրաինայի նախագահի մամուլի քարտուղար Սերգեյ Նիկիֆորովը։
Երկու առաջնորդները Վատիկան էին ժամանել Հռոմի Ֆրանցիսկոս պապի հուղարկավորությանը մասնակցելու համար։ Սպիտակ տան հաղորդակցության բաժնի տնօրեն Սթիվեն Չենգի խոսքով` Թրամփն ու Զելենսկին անցկացրել են փակ եւ արդյունավետ զրույց, որի մանրամասները կհրապարակվեն ավելի ուշ։
Այժմ Թրամփը եւ Զելենսկին Սուրբ Պետրոսի հրապարակում են, որտեղ ընթանում է պապի հուղարկավորության արարողությունը։
Ըստ Sky News-ի` կողմերը պայմանավորվել են հուղարկավորությունից հետո շարունակել բանակցությունները։
ԱՄՆ նախագահի հատուկ բանագնաց Սթիվ Ուիթքոֆը ապրիլի 25-ին այցելել էր Մոսկվա եւ արդեն չորրորդ հանդիպումը անցկացրել Ռուսաստանի Դաշնության նախագահ Վլադիմիր Պուտինի հետ։ Ռուսաստանի նախագահի օգնական Յուրի Ուշակովի փոխանցմամբ` հանդիպումը տեւել է երեք ժամ եւ «հնարավորություն է ընձեռվել հավելյալ մոտեցնել Ռուսաստանի եւ ԱՄՆ-ի դիրքորոշումները ոչ միայն Ուկրաինայի հարցում, այլեւ մի շարք այլ միջազգային խնդիրների շուրջ»։ Նա նաեւ նշել է, որ քննարկվել է Ռուսաստանի եւ Ուկրաինայի միջեւ ուղիղ բանակցությունների վերականգնման հնարավորությունը։
Իր հերթին Դոնալդ Թրամփը հայտարարել էր, որ ուրբաթը օրը եղել է «բարեհաջող օր Ռուսաստանի եւ Ուկրաինայի հետ բանակցությունների եւ հանդիպումների համար»։
«Կողմերը շատ մոտ են համաձայնության հասնելուն, եւ այժմ անհրաժեշտ է, որ նրանք հանդիպեն ամենաբարձր մակարդակով, որպեսզի գործընթացը հասցվի ավարտին։ Համաձայնեցված է արդեն հիմնական կետերի մեծ մասը»,- գրել էր ԱՄՆ նախագահը Truth Social-ի իր էջում։