Ռուսաստանը Զապորոժիեի ատոմակայանի կառավարման փոխանցման վերաբերյալ ԱՄՆ-ից առաջարկ չի ստացել, իսկ եթե ստանա, կբացատրի, որ վերահսկողության փոխանցումն անհնար է։ Այդ մասին հայտարարել է ՌԴ արտգործնախարար Սերգեյ Լավրովը CBS-ին տված հարցազրույցում։ Զրույցի ռուսերեն թարգմանությունը հրապարակվել է նախարարության կայքում։
«Ո՛չ, մենք այդպիսի առաջարկ չենք ստացել, իսկ եթե ստանանք էլ, կբացատրենք, որ Զապորոժիեի ատոմակայանի կառավարումը Ռուսաստանի պետական կորպորացիա համարվող «Ռոսատոմ»-ի վերահսկողության տակ է, Ատոմային էներգիայի միջազգային գործակալության (ԱԷՄԳ) անձնակազմի մշտական ներկայությամբ, որը հսկողություն է իրականացնում»,- նշել է Լավրովը։
Այսպես նա պատասխանել է այն հարցին, թե արդյոք Ռուսաստանը համաձայն է ԱՄՆ-ի հրապարակային այն հայտարարություններին, որ Վաշինգտոնն ու Կիեւը պետք է համատեղ կառավարեն Զապորոժիեի ատոմակայանը՝ անվտանգության բարձրացման նպատակով։
Լավրովը հավելել է, որ «ատոմակայանը հուսալի ձեռքերում է»։ Նա նաեւ մեղադրել է Ուկրաինային «կայանը մշտապես հարձակման ենթարկելու եւ միջուկային աղետ ստեղծելու փորձերի» համար։ Նման մեղադրանքներով Ուկրաինան էլ հանդես է գալիս Ռուսաստանի հասցեին։
Ռուսական զինված ուժերը Զապորոժիեի ատոմակայանը գրավել էին լայնածավալ ներխուժման սկզբում՝ 2022 թվականին։
Սպիտակ տունը մարտին հայտնել էր, որ ԱՄՆ նախագահ Դոնալդ Թրամփը Ուկրաինայի նախագահ Վլադիմիր Զելենսկու հետ զրույցի ընթացքում նշել էր, որ ատոմային էլեկտրակայանների «ամերիկյան սեփականությունը» կարող է լինել դրա «լավագույն պաշտպանությունը»։ Զելենսկին ընդգծել էր, որ բոլոր ատոմակայանները պատկանում են Ուկրաինայի ժողովրդին եւ չեն հանդիսանում մասնավոր սեփականություն։
Ապրիլին արեւմտյան լրատվամիջոցները հրապարակել էին ԱՄՆ-ի առաջարկած խաղաղ կարգավորման պլանը։ Դրա համաձայն՝ Զապորոժիեի ատոմակայանը կմնա Ուկրաինայի կազմում, սակայն կլինի ամերիկյան կառավարման ներքո եւ էլեկտրաէներգիա կմատակարարի ինչպես Ուկրաինային, այնպես էլ Ռուսաստանին։