ԱՄՆ նախագահ Դոնալդ Թրամփը հայտարարել է, որ Ուկրաինայի նախագահ Վլադիմիր Զելենսկին պատրաստ է հրաժարվելու Ղրիմը վերադարձնելու պահանջներից: Ավելի վաղ Զելենսկին հայտարարել էր, որ երբեք չի ճանաչի թերակղզու նկատմամբ Ռուսաստանի ինքնիշխանությունը, քանի որ դա հակասում է ուկրաինական սահմանադրությանը:
«Ոչ ոք չի բարձրացրել այս թեման 12 տարիների ընթացքում, իսկ հիմա հանկարծ սկսել են խոսել: Ուստի ես նրան (Վլադիմիր Զելենսկիին) ասացի՝ գուցե դիմեք (44-րդ ԱՄՆ նախագահ Բարաք) Օբամային, հարցրեք նրան, թե ինչու նա զիջեց այն (Ղրիմը)։ Ի դեպ նրանք այն զիջեցին առանց մեկ կրակոցի»,- հավելել է ԱՄՆ նախագահը լրագրողների հետ զրույցի ընթացքում, որը տեղի է ունեցել Նյու Ջերսիի Մորիսթաուն օդանավակայանում։
Մամուլի տվյալներով՝ ապրիլի 17-ին Ուկրաինայի եւ եվրոպական երկրների ներկայացուցիչներին Փարիզում ներկայացված ԱՄՆ-ի խաղաղության ծրագիրը ներառում է Ղրիմը Ռուսաստանի մաս ճանաչելու առաջարկ։ Այդ օրերին Զելենսկին հայտարարել էր, որ հրաժարվում է թերակզին որպես Ռուսաստանի մաս ճանաչելուց:
CBS News-ին տված հարցազրույցում, պատասխանելով Ղրիմի վերաբերյալ հարցին, ՌԴ արտաքին գործերի նախարար Սերգեյ Լավրովը հայտարարել էր, որ Ռուսաստանը «չի վարում բանակցություններ իր տարածքի մասին»: