Հայաստանի պաշտպանության նախարարությունը հերքում է Բաքվի այն հաղորդագրությունը, թե իբր ապրիլի 28-ին՝ 00:25-ի սահմաններում, ՀՀ ԶՈՒ ստորաբաժանումները կրակ են բացել սահմանագոտու արեւելյան հատվածում տեղակայված ադրբեջանական դիրքերի ուղղությամբ։
Պաշտպանական գերատեսչությունը հիշեցնում է, որ ՀՀ վարչապետի աշխատակազմն առաջարկել է ստեղծել հրադադարի ռեժիմի խախտման դեպքերի եւ/կամ այդ մասին տեղեկությունների հետաքննության Հայաստան-Ադրբեջան համատեղ մեխանիզմ, ինչին մինչ օրս Բաքուն չի արձագանքել։
«Հայաստանի Հանրապետության պաշտպանության նախարարությունը վերահաստատում է, որ ՀՀ վարչապետի աշխատակազմի դիրքորոշմանը համապատասխան՝ պատրաստ է հետաքննելու Ադրբեջանի ՊՆ հաղորդագրությունը հիմնավորող փաստերը դրանք ՀՀ-ին փոխանցելու պարագայում»,-ասվում է ՀՀ ՊՆ հաղորդագրության տեքստում։
Հիշեցնենք, որ մարտի վերջից սկսած՝ Ադրբեջանի պաշտպանության նախարարությունը բազմաթիվ հայտարարություններ է տարածել, որոնցում Հայաստանի զինված ուժերին մեղադրում է իբր սահմանագոտու արեւելյան եւ հարավարեւելյան հատվածներում հրադադարի ռեժիմը խախտելու համար։
Հայաստանի պաշտպանության նախարարությունը հերքել էր այս մեղադրանքները, իսկ ապրիլի 1-ին, 13-ին, 21-ին եւ 24-ին հաղորդել Սյունիքի մարզի Խնածախ բնակավայրի ուղղությամբ արձակված կրակոցների մասին, որոնց հետեւանքով վնասվել էին մեկ բնակելի տուն եւ մշակույթի տունը։
Ապրիլի 22-ին Հայաստանում տեղակայված ԵՄ դիտորդական առաքելության ներկայացուցչությունը հայտարարեց, որ Խոզնավարում կատարված պարեկության ժամանակ նկատել են հարակից ադրբեջանական դիրքերից արձակված կրակոցի հետքերը։