Հնդկաստանի բանակի ներխուժումը Պակիստանի տարածք «անխուսափելի» է, հայտարարել է Պակիստանի պաշտպանության նախարար Խավաջա Ասիֆը Reuters գործակալությանը տված հարցազրույցում:
«Մենք ամրապնդել ենք մեր ուժերը, քանի որ դա [ներխուժումը] այժմ անխուսափելի է։ Նման իրավիճակում անհրաժեշտ է ռազմավարական որոշումներ կայացնել, եւ դրանք արդեն կայացվել են»,- ասել է Ասիֆը:
Խավաջա Ասիֆը նշել է, որ Հնդկաստանի հռետորաբանությունն ավելի կոշտ է դարձել, եւ որ Պակիստանի զինված ուժերը տեղեկացրել են կառավարությանը հնարավոր հարձակման մասին։ Նա նաեւ հայտնել է, որ Պակիստանի իշխանությունները կապի մեջ են Չինաստանի, Պարսից ծոցի երկրների, Մեծ Բրիտանիայի եւ ԱՄՆ-ի հետ։
Ասիֆը չի հստակեցրել, թե ինչու է կարծում, որ ներխուժումն անխուսափելի է, եւ չի նշել, թե ինչ բնույթ է այն ունենալու՝ լայնածավալ, թե սահմանափակ։
Հնդկաստանի եւ Պակիստանի միջեւ հարաբերությունները լարվեցին, երբ ապրիլի 22-ին Հնդկաստանի Ջամմու եւ Քաշմիր նահանգի Պահալգամ զբոսաշրջային քաղաքում մահապարտ ահբեկչի հարձակման հետեւանքով սպանվեց 26 մարդ։
Հնդկական կողմի պնդմամբ՝ հարձակումն իրականացրել են Պակիստանում գործող «Լաշկար-է-Թայբա» իսլամական խմբավորման դիվերսիոն թեւ հանդիսացող «Դիմադրության ճակատի» մարտիկները։ Դրանից հետո Հնդկաստանի կառավարությունը կրճատեց Իսլամաբադում իր դեսպանատան աշխատակիցների քանակը, Հնդկաստանում Պակիստանի դիվանագիտական առաքելության ռազմական խորհրդականներին հայտարարեց անցանկալի անձ եւ կասեցրեց Ինդոս գետի վերաբերյալ 1960 թվականի պայմանագիրը, որը կողմերի համար կարգավորում էր ջրային ռեսուրսների օգտագործման իրավունքը։