ՌԴ նախագահ Վլադիմիր Պուտինը շարունակում է պնդել, որ խաղաղության պայմանագրի շրջանակում Մոսկվան պետք է լիարժեք վերահսկողություն ստանա Դոնեցկի, Լուգանսկի, Զապորոժիեի եւ Խերսոնի մարզերի նկատմամբ, որոնք Ռուսաստանը մասնակիորեն օկուպացրել եւ անեքսիայի է ենթարկել։ Այդ մասին «Bloomberg»-ին հայտնել են Մոսկվայում բանակցություններին ծանոթ երեք աղբյուրներ։
ԱՄՆ նախագահի հատուկ բանագնաց Սթիվ Ուիթքոֆը ապրիլի 25-ին Պուտինի հետ հանդիպման ժամանակ փորձել է համոզել Ռուսաստանի նախագահին համաձայնել հրադադարի եւ պատերազմը ներկայիս ճակատային գծերով դադարեցնելու առաջարկին, հայտնել են գործակալության երկու զրուցակիցներ։ Սակայն, ըստ նրանց, Պուտինը շարունակել է պնդել իր տարածքային առավելապաշտական պահանջները։
Այս պահին բանակցությունները մտել են փակուղի, հայտնել է Bloomberg-ի մեկ այլ զրուցակից։ Նրա կարծիքով՝ հետագա առաջընթաց հնարավոր է միայն Ռուսաստանի նախագահ Վլադիմիր Պուտինի եւ ԱՄՆ նախագահ Դոնալդ Թրամփի անձնական հանդիպման դեպքում։
Վլադիմիր Պուտինի՝ առավելապաշտական պահանջներից չնահանջելու ցանկությունը հարված է հասցնում Դոնալդ Թրամփի ջանքերին, որն ուղղված է հրադադարի եւ Ռուսաստանի ու Ուկրաինայի միջեւ վերջնական խաղաղության համաձայնագրի ձեռքբերմանը, գրում է Bloomberg-ը։
Այս ամենը տեղի է ունենում այն պայմաններում, երբ Սպիտակ տանը աճում է դժգոհությունը՝ կապված ռուս-ուկրաինական պատերազմի ավարտի շուրջ բանակցություններում առաջընթացի բացակայության հետ։ ԱՄՆ ղեկավարությունն արդեն սպառնացել է դուրս գալ բանակցային գործընթացից, եթե Ռուսաստանը եւ Ուկրաինան մոտ ժամանակում համաձայնության չգան։
Bloomberg-ին եվրոպացի պաշտոնյաները հայտնել են, որ այս պահի դրությամբ չկա որեւէ նշան, որ Պուտինը պատրաստ է հրաժարվելու իր տարածքային պահանջներից եւ ընդունելու ԱՄՆ-ի առաջարկները պատերազմի դադարեցման վերաբերյալ։ Նրանք նշել են, որ բանակցությունները շարունակվում են, եւ այս գնահատականները կարող են փոխվել։ Նրանց կարծիքով՝ առաջիկա մի քանի շաբաթների ընթացքում պարզ կլինի՝ արդյոք Վաշինգտոնին կհաջողվի հասնել Մոսկվայի եւ Կիեւի միջեւ համաձայնության, թե ԱՄՆ-ը դուրս կգա բանակցություններից եւ կուժեղացնի ճնշումը Ռուսաստանի վրա։