Արցախի ՊՆ մամուլի ծառայությունից հերքել են Ադրբեջանի ՊՆ-ի տարածած հաղորդագրությունը, ըստ որի՝ ՊԲ ստորաբաժանումները հուլիսի 10-ին իբր բազմիցս խախտել են հրադադարը՝ կրակ բացելով Արցախի Ասկերանի եւ Մարտունու շրջանների՝ Բաքվի վերահսկողության տակ անցած տարածքներում տեղակայված ադրբեջանական դիրքերի ուղղությամբ։ Ադրբեջանի տարածած լուրը հերթական ապատեղեկատվություն որակելով՝ Արցախի պաշտպանական գերատեսչությունը միաժամանակ կեղծ է որակել «իրենց գործողությունների արդյունքում իբրեւ թե դադարեցված ինժեներական աշխատանքների մասին Ադրբեջանի ՊՆ-ի պնդումը»։
Արցախի ՊՆ-ից հիշեցրել են, որ հուլիսի 10-ին` 9։30-10։45-ը, ադրբեջանական ստորաբաժանումները հրաձգային զենքից կրակ են բացել Սարուշեն համայնքի դաշտերում գյուղատնտեսական աշխատանքներ կատարող կոմբայնի ուղղությամբ։ «Ինչպես արդեն հաղորդել ենք նախորդիվ, Ադրբեջանի ՊՆ-ի ստահոդ հայտարարությունները նպատակ ունեն արդարացնելու գյուղատնտեսական աշխատանքները խափանելու նպատակով Արցախի Հանրապետության քաղաքացիների եւ գյուղատնտեսական տեխնիկայի ուղղությամբ պարբերաբար բացվող կրակը»,- նշված է Արցախի ՊՆ-ի հաղորդագրության մեջ։