Ըստ Արցախի առողջապահության նախարարության տարածած հաղորդագրության՝ Արցախը Հայաստանին կապող միակ ճանապարհը (Լաչինի միջանցքը) Ադրբեջանի կողմից 8 ամիս շարունակ արգելափակված լինելու պայմաններում, դեղորայքի ու սննդի խիստ սղությամբ եւ շարունակական սթրեսով պայմանավորված, պաշարված Արցախում նախորդ տարվա համեմատ աճել են մի շարք հիվանդություններից բարդացումների ցուցանիշները։
Սուր սրտային անբավարարությունից մահերն աճել են 2,5 անգամ
Յոթ ամսվա (հունվար-հուլիս) ընթացքում ընդհանուր մահվան դեպքերի շարքում արյան շրջանառության համակարգի հիվանդություններից արձանագրվել է մահերի թվի աճ ավելի քան 2 անգամ, ներառյալ սուր եւ քրոնիկ սրտային անբավարարությունից մահերի թվի աճ՝ 66%-ով, սրտամկանի սուր ինֆարկտից՝ 20,8%-ով, ուղեղի կաթվածից՝ 8,8%-ով։ Հուլիսի ընթացքում արյան շրջանառության համակարգի հիվանդություններից մահվան դեպքերն էլ ավելի են աճել՝ հասնելով 2.6 անգամի՝ նախորդ տարվա հուլիսի համեմատ, ներառյալ սուր սրտային անբավարարությունից մահերի թվի աճ՝ 2․5 անգամ, սրտամկանի սուր ինֆարկտից՝ 4 անգամ, ուղեղի կաթվածից՝ 3 անգամ:
Ուղեղի կաթվածի դեպքերն աճել են 26%-ով
Յոթ ամսում չարորակ նորագոյացություններից մահերի քանակը աճել է 15,9%-ով։ Մահվան դեպքերի ավելացման պատճառներից են անհրաժեշտ դեղորայքի սղությունը կամ բացակայությունը, կյանքի որակի փոփոխությունը, պատշաճ բուժօգնության հնարավորությունների խիստ սահմանափակությունը, որոնք կրճատում են ապրելիության աստիճանը։ Նույն ժամանակահատվածում բնակչության շրջանում արձանագրվել է գլխուղեղի արյան շրջանառության սուր խանգարման (ուղեղի կաթված) եւ սրտամկանի սուր ինֆարկտի նոր դեպքերի աճ՝ համապատասխանաբար 26%-ով եւ 9,7%-ով։
Հղի կանանց շրջանում սակավարյունության մակարդակը հասել է մոտ 90%-ի
Հունվար-հուլիս ժամանակահատվածում արձանագրվել է չարորակ նորագոյացությունների նոր հայտնաբերված դեպքերի աճ 24,3%-ով: Հունվար-հուլիսի ընթացքում, նախորդ տարվա նույն ժամանակահատվածի համեմատ, բժիշկների հսկողության տակ գտնվող հղի կանանց շրջանում սակավարյունության մակարդակը հասել է մոտ 90%-ի։ Դա պայմանավորված է ոչ լիարժեք սննդով եւ համապատասխան դեղամիջոցների սղությամբ կամ բացակայությամբ։ Թեեւ առաջին կիսամյակի ընթացքում ընդհանուր վիժումների քանակի աճ չի արձանագրվել, սակայն հուլիսին արձանագրվել է բժշկի ցուցումով վիժումների կտրուկ աճ՝ 4 անգամ։ Ցավալի իրավիճակին նպաստում են սթրեսը, ոչ լիարժեք սնունդը եւ դեղորայքի սղությունը կամ բացակայությունը։
Ուշագնացության դեպքերն աճել են 91%-ով
Հանրապետության Շտապ օգնության ծառայությունում հուլիսին հաճախակի են դարձել ուշագնացության (կոլապս) դեպքերը։ Նախորդ տարվա հուլիսի համեմատ ուշագնացության դեպքերն աճել են 91%-ով։ Շատ հաճախ լինում են դեպքեր, երբ կա ուշագնացություն, սակայն մինչեւ շտապ օգնության անձնակազմի ժամանելը քաղաքացուն ուշքի են բերում, եւ փաստացի չի գրանցվում դեպքը: Հուլիսին, նախորդ տարվա նույն ժամանակահատվածի համեմատ, արձանագրվել է նաեւ զարկերակային գերճնշման դեպքերի պատճառով շտապ օգնության կանչերի կտրուկ՝ 5․6 անգամ աճ։