ԿԽՄԿ–ից հայտնել են, որ Հայաստանում Կարմիր խաչի միջազգային կոմիտեի աշխատակիցներն այցելել են Հայաստանի տարածք ապօրինի մուտք գործած երկու ադրբեջանցի զինծառայողներ Հուսեյն Ախունդովին ու Աղշին Բաբիրովին: «Զինծառայողներին հնարավորություն է տրվել հեռախոսով կապ հաստատելու ընտանիքների հետ եւ նամակներ ուղարկելու ԿԽՄԿ-ի միջոցով»,– նշել են կոմիտեից։
Ադրբեջանցի այս զինծառայողները ՀՀ սահմանը հատել էին Նախիջեւանի կողմից եւ Հայաստանի տարածքում հայտնվել այս տարվա ապրիլին: Իր երկու զինծառայողի մոլորվելու մասին Ադրբեջանի ՊՆ-ն հաղորդել էր ապրիլի 10-ին: Հայաստանում հենց նույն օրը Սյունիքի մարզի Աշոտավան գյուղում ձերբակալվել էր Բաբիրովը, Ախունդովը հայտնաբերվել եւ ձերբակալվել էր երեք օր անց Աճանան գյուղի մոտակայքում։ Ադրբեջանի երկու քաղաքացիների նկատմամբ հարուցվել է հանրային քրեական հետապնդում, նրանք կալանավորվել են: Գլխավոր դատախազությունը ապրիլի 18-ին հաղորդել է, որ Ախունդովը ապրիլի 12-ին Կապան համայնքի Շղարշիկ գյուղի մոտ սպանել էր Զանգեզուրի պղնձամոլիբդենային կոմբինատի պահակ Հայրապետ Մելիքսեթյանին։