Սիրիայի ժամանակավոր նախագահ Ահմադ ալ-Շարաան հայտարարել է անցումային կառավարության ձեւավորման մասին։ Նոր կաբինետի անդամները պաշտոնները ստանձնել են Դամասկոսի Քասր ալ-Շաաբ պալատում տեղի ունեցած արարողության ժամանակ: Տեղեկությունը հաղորդել է Al Hadath հեռուստաալիքը։
Կառավարության կազմում ընդգրկվել է 23 տեխնոկրատ նախարար: Նրանց թվում է նաեւ մեկ կին՝ Հինդ Քաբվաթը, որը նշանակվել է Սիրիայի աշխատանքի եւ սոցիալական հարցերի նախարար:
Սիրիայի անցումային կառավարության ԱԳՆ եւ ՊՆ ղեկավարները՝ Ասաադ Հասան ալ-Շիբանին եւ Մուրհաֆ Աբու Քասրան, պահպանել են իրենց պաշտոնները նոր կաբինետում։ Արտաքին գործերի նախարարը խոստացել է, որ «սիրիական դիվանագիտությունը կդառնա իմաստության եւ երկխոսության ձայն»: Պաշտպանության նախարարը հայտարարել է, որ Սիրիայում կվերականգնվի բանակը, «որին պատկանելը կլինի սիրիացիների համար հպարտության աղբյուր»:
Ներքին գործերի նախարար է նշանակվել Ընդհանուր հետախուզության ծառայության նախկին ղեկավարը՝ Անաս Հասան Խատտաբը։
Անցումային շրջանի նախկին վարչապետ Մուհամմեդ ալ-Բաշիրը դարձել է էներգետիկայի նախարար։ Նավթի նախարարությունը լուծարվել է եւ ներառվել նորաստեղծ էներգետիկայի նախարարության կազմում։
Արդարադատության նախարար է դարձել Մազհեր ալ-Վեյսը, էկոնոմիկայի նախարար Նիդալ ալ-Շաարը։ Ֆինանսների նախարարի պաշտոնը ստանձնել է Մուհամմեդ Յասիր Բարնիան։ Առողջապահության նախարար է նշանակվել Մուսաբ Նազզալ ալ-Ալին։
Բարձրագույն կրթության եւ գիտական հետազոտությունների նախարար է դարձել Մարուան ալ-Հալաբին։
Հանդիսավոր արարողության ընթացքում Ալ-Շարաան վստահեցրել է սիրիացի ժողովրդին «ուժեղ եւ կայուն պետության կառուցման մեկնարկի մասին, որը երաշխավորելու է ազգի եւ յուրաքանչյուր քաղաքացու շահերը»։
Նա ընդգծեց, որ կառավարության ամբողջ աշխատանքը լինելու է թափանցիկ։ «Մենք չենք թույլատրի, որ կոռուպցիան ներթափանցի պետական հիմնարկներ»,– հայտարարել է նա։
Մարտի 13-ին ընդունված սահմանադրական հռչակագրի համաձայն, որը Սիրիայի անցումային փուլի իրավական հիմքն է, կառավարության աշխատանքը ղեկավարելու է ժամանակավոր նախագահը, որի ձեռքում կենտրոնացած է ամբողջ գործադիր իշխանությունը։ Իսկ Արաբական հանրապետության ժողովրդական խորհուրդը (խորհրդարանը) օժտված է նախարարներին հրավիրելու և նրանց հաշվետվությունները լսելու իրավունքով։