Առողջապահության համաշխարհային կազմակերպության գլխավոր տնօրեն Փեդրոս Գեբրեյեսուսը հայտարարել է, որ կորոնավիրուսի նոր՝ ավելի բարձր վարակելիություն ունեցող տարբերակները հաղթում են պատվաստանյութերի դեմ պայքարում, քանի որ աշխարհում պատվաստանյութերի դեղաչափերի բաշխման տեսանկյունից հավասարություն չկա:
Ժնեւում լրագրողների հետ զրույցում Գեբրեյեսուսն ընդգծել է, որ դա նաեւ սպառնալիք է համաշխարհային տնտեսական վերականգնման համար։
Իսրայելական նվաճումն ու Դելտա շտամի անակնկալը
Ըստ MedicalXpress-ի՝ կորոնավիրուսի թեթեւ ձեւերի կանխմանը միտված պատվաստանյութերը պակաս արդյունավետ են դառնում նոր շտամների դեպքում։ Սրա մասին է վկայում Իսրայելում կորոնավիրուսի Դելտա շտամով վարակվելու նոր դեպքերի աճը, որտեղ բնակչության մեծ մասը ստացել է Pfizer/BioNTech պատվաստանյութ։
Իհարկե, չափազանց վաղ է խոսել ապրիլին հայտնաբերված եւ ամբողջ աշխարհում արագ տարածվող հնդկական շտամի դեմ պատվաստանյութերի արդյունավետության վատթարացման մասին, բայց նախնական եզրահանգումներ արվում են։
Իսրայելում կորոնավիրուսի դեմ պատվաստումը մյուս երկրներից ավելի արագ ընթացավ, եւ վիրուսի փոխանցումը նվազեց մինչեւ օրը 5 դեպք։ Սակայն վերջին օրերին Դելտայի տարածման պատճառով վարակման դեպքերի թիվն ավելացել է 300-ով։
Զրոյական ցուցանիշից՝ 300 դեպքի
Հիվանդացածների գրեթե կեսը երեխաներ են, իսկ մյուս կեսը՝ պատվաստված մեծահասակներ։ Պատվաստված մեծահասակները գրեթե 85 տոկոսն են։ Որոշ մասնագետներ պնդում են, որ նոր վարակումների թիվը գերազանցում է սպասված սահմանը։
Պատվաստված իսրայելցիների շրջանում ծանր դեպքերի թիվը վերջին օրերին ավելացել է երկու օրը մեկ միջինը 3 դեպքով։ Փորձագետները հույս ունեն, որ լուրջ հիվանդությունների դեմ պատվաստանյութի արդյունավետությունը կմնա նույնքան բարձր, որքան Ալֆա շտամի դեպքում, որն առաջին անգամ հայտնաբերվել է Մեծ Բրիտանիայում դեկտեմբերին։
Նշենք, որ վերջին 12 օրում մահացության մակարդակն Իսրայելում զրոյական էր։