Ըստ ռուսական ՏԱՍՍ գործակալության՝ ՌԴ արտգործնախարար Սերգեյ Լավրովը հայտարարել է, որ Մոսկվան ուշիուշով հետեւում է Աֆղանստանում ստեղծված իրավիճակին, որը սրընթաց վատթարանալու միտում ունի: Նա նշել է, որ հարկ եղած դեպքում Կրեմլը պատրաստ է պաշտպանելու տարածաշրջանային իր դաշնակիցներին։
Ռուսաստանի արտգործնախարարը շեշտել է, որ ամերիկյան զորքերն ու ՆԱՏՕ-ն, տասնամյակների ընթացքում գտնվելով այդ երկրում, չկարողացան իրավիճակի կայունացման շոշափելի արդյունքների հասնել:
Լավրովն ընդգծել է, որ Ռուսաստանն իր դաշնակիցների հանդեպ ագրեսիվ ոտնձգություններ թույլ չտալու համար հնարավոր ամեն ինչ կանի՝ ընդհուպ օգտագործելով Աֆղանստանի հետ Տաջիկստանի սահմանին տեղակայված ռուսական ռազմակայանի հնարավորությունները:
Աֆղանստանում թալիբ զինյալներն իրենց վերահսկողության տակ են վերցրել երկրի զգալի մասը, գրավել Տաջիկստանին սահմանակից շրջանները։ Աֆղանստանի բանակի հարյուրավոր զինծառայողներ թալիբների հարձակումներից փախել են Տաջիկստան։