Ըստ թուրքական «Haber Global»-ի՝ Թուրքիայի պաշտպանության նախարար Հուլուսի Աքարն ու նրա ադրբեջանցի գործընկեր Զաքիր Հասանովը Անկարայում հանդիպման ընթացքում քննարկել են երկկողմ հարաբերություններին վերաբերող, ինչպես նաեւ տարածաշրջանային հարցեր:
Աքարը Հասանովին է ներկայացրել Մոսկվայում Թուրքիայի եւ Հայաստանի միջեւ հարաբերությունների կարգավորման համար կայացած առաջին հանդիպման ձեռք բերված պայմանավորվածությունները։
Հուլուսի Աքարը Զաքիր Հասանովի հետ համատեղ ասուլիսի ընթացքում հայտարարել է, որ Անկարան եւ Բաքուն խաղաղության ձեռք են մեկնել Հայաստանին։
«Կարեւոր հարցերից մեկն այն է, որ մեր նախագահի եւ պարոն Ալիեւի բանակցություններից հետո խաղաղության ձեռք է մեկնվել Հայաստանին, մենք սպասում եւ ցանկանում ենք, որ այդ քայլը գնահատվի»,- ասել է Աքարը։
Ըստ Թուրքիայի պաշտպանության նախարարի՝ իրենք ձգտում են խաղաղություն հաստատելու ոչ միայն Հայաստանի ու Ադրբեջանի կամ Հայաստանի ու Թուրքիայի միջեւ, այլեւ ամբողջ տարածաշրջանում։