Ապրիլի առաջին օրերին Երեւանում էր Միացյալ Թագավորության խորհրդարանի Մեծ Բրիտանիա-Հայաստան բարեկամական խմբի ղեկավար Թիմ Լոութընի գլխավորած պատվիրակությունը:
Պատվիրակության կազմում էր նաեւ հայ ժողովրդի բարեկամ Քերոլայն Քոքսը, որի այցելությունները Արցախ 1990-ականներից անցնում են 85-ից: Այս անգամ, սակայն, բարոնուհին չի այցելել Ստեփանակերտ:
Բարեկամական խմբի անդամներին եւ նրանց ուղեկցող Հայաստանի Ազգային ժողովի պատգամավորներին պատահաբար հանդիպեցի Գորիսում: Նրանք մեկ գիշեր մնացին այն հյուրանոցում, որտեղ ես էի:
Բարոնուհի Քոքսին եւ պատվիրակության անդամներին Ֆորին Օֆիսը խորհուրդ չի տվել այցելել Արցախ՝ վկայակոչելով անվտանգության խնդիրները:
Բրիտանացի խորհրդարանականների՝ Արցախ այցելության եւս մեկ հնարավոր խոչընդոտ կա՝ ռուսական ներկայությունը, թեեւ արդարացված չէ ռուսների վրա բարդել մեղքը, երբ իրենք՝ բրիտանացիները, խուսափում են Ստեփանակերտ այցելելուց:
Մեծ Բրիտանիայի համար Ադրբեջանը շատ ավելի արժեք ու կարեւորություն ունի: Բացի այդ, եթե բարձրաստիճան հայ պաշտոնյաները չեն այցելում Արցախ՝ չվտանգելու փխրուն խաղաղությունը, ապա ինչո՞ւ դա պետք է անեն բրիտանացիները:
Բրիտանացի խորհրդարանականները այցելել են Տեղ համայնք եւ մոտիկից դիտարկել հայ-ադրբեջանական նոր սահմանը: Նրանք Գորիսում հանդիպում են ունեցել արցախցի պաշտոնյաներից մեկի հետ (քանի որ այդ մասին պաշտոնական հաղորդագրություն չի տարածվել, մենք եւս չենք հրապարակում մանրամասներ): Պաշտոնական հաղորդագրություն չի տարածվել նաեւ այն մասին՝ արդյոք նրանք հանդիպել են Արցախի նախագահի հետ, ով այդ օրերին Երեւանում էր:
Հայաստանում գտնվելու օրերին բրիտանացի խորհրդարանականները հանդիպել են վարչապետ Նիկոլ Փաշինյանի, Ազգային ժողովի նախագահի եւ խորհրդարանականների հետ: Մասնավորապես, Փաշինյանն իր դիտարկումներն է ներկայացրել Լեռնային Ղարաբաղի շուրջ տեղի ունեցող գործընթացների վերաբերյալ եւ ընդգծել Ադրբեջանի կողմից իրականացվող ապակառուցողական գործողություններին միջազգային հանրության համարժեք արձագանքի կարեւորությունը: Վարչապետն անդրադարձել է Արցախում ադրբեջանական գործողությունների հետեւանքով առաջացող հումանիտար խնդիրներին, Ադրբեջանի զինված ուժերի վերահսկողության տակ անցած տարածքներում հայկական մշակութային ժառանգության ոչնչացման քայլերին, Հայաստանի եւ Ադրբեջանի միջեւ սահմանագծման ու սահմանազատման, տարածաշրջանային ապաշրջափակման հնարավորություններին, ինչպես նաեւ հայ-թուրքական երկխոսությանը:
Լրագրող, հրապարակախոս, պատմություն հետազոտող, որն առօրյա փաստերը, դրանց վրա հիմնված դատողություններն ու պատմական փորձառությունը հաջողությամբ միահյուսելով ստանում է ուրույն բովանդակություն։