ՀՀ ԱԳՆ մամուլի ծառայությունից հայտնել են, որ ՀՀ արտգործնախարար Արարատ Միրզոյանն ապրիլի 4-ին ընդունել է Մեծ Բրիտանիայի Համայնքների պալատի՝ Հայաստան-Մեծ Բրիտանիա խորհրդարանական բարեկամական խմբի պատվիրակությանը, որը գլխավորում էր խմբի ղեկավար Թիմ Լոութընը։
Կողմերը քննարկել են Լեռնային Ղարաբաղի հակամարտության գոտում եւ Հայաստան-Ադրբեջան սահմանագոտում ստեղծված իրավիճակը։
Նախարար Միրզոյանը մանրամասն ներկայացրել է ադրբեջանական զինված ուժերի` Արցախի Փառուխ գյուղ ներխուժման, քաղաքացիական բնակչության եւ ենթակառուցվածքների թիրախավորման, Արցախում հումանիտար ճգնաժամ ստեղծելուն ուղղված գործողությունները, Ադրբեջանի վերահսկողության տակ անցած տարածքներում հայկական մշակութային ու կրոնական ժառանգության պաշտպանությանն առնչվող խնդիրները:
Զրուցակիցներն անդրադարձել են Հայաստանի եւ Ադրբեջանի միջեւ համապարփակ խաղաղության պայմանագրի շուրջ բանակցություններին։
ՀՀ արտգործնախարարը շեշտել է ԵԱՀԿ Մինսկի խմբի ձեւաչափի շրջանակում բանակցություններ սկսելու կարեւորությունը՝ ուղղված համապարփակ վերջնական կարգավորմանը` ներառյալ Լեռնային Ղարաբաղի կարգավիճակի հստակեցումը։
Հյուրերի խնդրանքով նախարար Միրզոյանն անդրադարձել է նաեւ Հայաստան-Թուրքիա հարաբերությունների կարգավորման գործընթացին: