ՀՀ ԱԳ նախարար Արա Այվազյանը հայտարարել է, որ գերիների վերադարձի հումանիտար, կարեւորագույն հարցի քաղաքականացումն անընդունելի է՝ անդրադառնալով Ադրբեջանի նախագահի հայտարարությանը, թե Ադրբեջանը հայ բոլոր գերիներին վերադարձրել է, իսկ իրենց մոտ պահվող մյուս անձինք հանցագործներ ու դիվերսանտներ են։
Հիշեցնելով տարբեր միջազգային կառույցների կողմից Ալիեւի հայտարարության անընդունելիության մասին ընդունված բանաձեւերի մասին՝ Այվազյանը փաստել է, որ տարբեր երկրների, միջազգային կառույցների ղեկավարներն արդեն ավելացնում են այս հարցով միջազգային ճնշումն Ադրբեջանի վրա։ «Վերջինը` երեկ Իտալիայի խորհրդարանը նույնպես ընդունել է բանաձեւ` կոչ անելով Ադրբեջանին անհապաղ լուծում տալ այս հումանիտար կարեւորագույն հարցին»,- նշել է նա:
ՀՀ արտաքին գերատեսչության ղեկավարը հավաստիացրել է, որ գերիների վերադարձի համար հայկական կողմն օգտագործում է բոլոր խողովակները՝ հատկապես կարեւորելով տարածաշրջանում ՌԴ-ի դերը:
Նախարարն ընդգծել է, որ ՌԴ նախագահ Վլադիմիր Պուտինի, ԱԳ նախարար Սերգեյ Լավրովի, պաշտպանության նախարար Սերգեյ Շոյգուի միջոցով անմիջական շփումներ են տեղի ունենում, եւ ռուսական կողմը հետեւողականորեն բարձրացնում է հարցը Ադրբեջանի ղեկավարության մոտ։
Արա Այվազյանը հավելել է, որ ԵԱՀԿ ՄԽ համանախագահների զրույցների մակարդակում հատուկ ընդգծել է գերիների հարցը։