Եվրոպայում անցյալ շաբաթ սկսված ցրտերը կշարունակվեն նաեւ այս շաբաթ։ Գերմանիայում ջերմաստիճանը կլինի զրոյից ցածր, Մեծ Բրիտանիայի որոշ հատվածներում ձյուն կտեղա։ Մի կողմից, իհարկե, այս ամենը տոնական տրամադրություն կարող է հաղորդել, քանի որ առջեւում Սուրբ Ծննդի եւ Ամանորի տոներն են։ Մյուս կողմից ցուրտ եղանակը եվրոպական էներգահամակարգերի համար կվերածվի իսկական «փորձության»։
Ըստ Bloomberg լրատվական գործակալության՝ Եվրոպայում մեղմ աշունը նպաստեց, որ ջեռուցման համար ծախսվող գազի ծավալների հարցում խնայողություններ կատարվեն, եւ գազապահեստարանները լցնեն՝ ապահովագրելով եվրոպացիներին ձմեռային սեզոնին վառելիքային սուր դեֆիցիտից, որը կարող էր առաջանալ Ռուսաստանի կողմից մատակարարումների դադարեցման հետեւանքով։ Սակայն այժմ կարծես թե սկսվում են խնդիրներ։ Ջեռուցման պահանջարկն աճում է, ու բրիտանական, գերմանական կամ սկանդինավյան քամիով աշխատող էլեկտրակայանների համար այդ պահանջարկը ծածկելը նույնքան դժվար է լինելու, որքան շվեդական եւ ֆրանսիական ատոմակայանների համար։ Ու թեեւ եվրոպական ամենամեծ տնտեսությունն ունեցող Գերմանիայի իշխանություններն ակնկալում են, որ ձեռվա ցուրտ ամիսներին բավարար էներգիա կունենան, սակայն գերմանական էներգահամակարգի կարգավորող մարմինն անցյալ շաբաթվա վերջին հանդես եկավ հայտարարությամբ՝ հորդորելով տնային տնտեսություններին եւ ձեռնարկություններին վառելիքի խնայման համար սահմանափակել ջեռուցումը։
Օդերեւութաբանները չեն բացառում, որ ցուրտ եղանակը Եվրոպայում կպահպանվի դեկտեմբերի մեծ մասը, եւ ջեռուցման պահանջարկը կշարունակի ավելանալ։ Արդեն այսօր՝ դեկտեմբերի 12-ին, սպասվում է, որ սնդիկի սյունը Շվեդիայի ամենահյուսիսային շրջաններում կիջնի մինչեւ -23 °C-ի։ Սպասվում է, որ ձյուն կտեղա Շոտլանդիայում, Լոնդոնում, Անգլիայում։ Ընդ որում՝ «Մառախլապատ Ալբիոնում» ցուրտ եղանակը, ըստ տեղի օդերեւութաբանների, կպահպանվի եւս 10 օր։
Եղանակային այժմյան ցուրտ պայմաններում Շվեդիայում վթար է տեղի ունեցել այդ երկրի ամենամեծ միջուկային ռեակտորի վրա, եւ կա ռիսկ, որ երկրի տարբեր շրջաններում հնարավոր են նույնիսկ էլեկտրաէներգիայի եւ ջեռուցման անջատումներ։ Անջատումներից խուսափելու համար հարկ կլինի էլեկտրաէներգիա ներկրել Նորվեգիայից, Գերմանիայից եւ Լեհաստանից։ Գերմանիայում, թեեւ նոյեմբերին, երբ համեմատաբար մեղմ եղանակ էր, էներգախնայողության միջոցառումներ իրականացվեցին, սակայն սպասվում է, որ Համբուրգում եւ Բեռլինում, օրինակ, լինելու է -7 °C, ինչը բնականաբար նշանակում է, որ, օրինակ, տնային տնտեսությունների անհատական ջեռուցման համակարգերը միացվելու են։
Մասնագետները նկատում են, որ Եվրոպայի էներգետիկ համակարգերը չափազանց զգայուն են լինելու եղանակային պայմանների ցանկացած փոփոխության, նույնիսկ քամու ուժգնացման կամ թուլացման նկատմամբ։ Ի դեպ, այսօր սպասվում է, որ Մեծ Բրիտանիայում նկատվելու է քամու ուժգնացում, ինչը կարճաժամկետ հեռանկարում կարող է էնեգակիրների գնաճի հանգեցնել։
Պատրաստեց Արման Գրիգորյանը