Մատենադարանում դեկտեմբերի 12-ին մեկնարկել է նոր տեխնոլոգիաների դարաշրջանում ցեղասպանության կանխարգելման հարցին նվիրված «Ընդդեմ ցեղասպանության հանցագործության» 4-րդ գլոբալ ֆորումը։ Ֆորումը կանդրադառնա ցեղասպանության կանխարգելման գործում նոր տեխնոլոգիաների կիրառման մարտահրավերներին, հնարավորություններին եւ հեռանկարներին: Միջոցառումը կազմակերպվել է Ցեղասպանության կանխարգելման հարցերով ՄԱԿ-ի գլխավոր քարտուղարի հատուկ խորհրդականի աջակցությամբ եւ Ցեղասպանագետների միջազգային ասոցիացիայի եւ Զանգվածային ոճրագործությունների կանխարգելմանն ուղղված գլոբալ գործողության (GAAMAC) հետ սերտ համագործակցությամբ:
Ֆորումում ելույթ կունենա ՄԱԿ-ի գլխավոր քարտուղարի տեղակալ, Ցեղասպանության կանխարգելման հարցերով ՄԱԿ-ի հատուկ խորհրդական Ալիս Վայիրիմու Նդերիտուն։ Ներկա կլինեն մարդու իրավունքների մասնագետներ, ցեղասպանագետներ, մշակույթի ոլորտի պատասխանատու պաշտոնյաներ, առաջատար համալսարանների, միջազգային կազմակերպությունների եւ կառավարությունների ղեկավարներ եւ ներկայացուցիչներ:
Լիագումար նիստին կհաջորդեն թեմատիկ քննարկումները։ Առաջին թեմատիկ քննարկումը տեղի կունենա «Նոր տեխնոլոգիաների չարարկումը եւ ցեղասպանության վտանգը» թեմայով։ Երկրորդ թեմատիկ քննարկումը նվիրված կլինի «Սոցիալական հարթակները որպես ատելության տարածման գործիք. կանխարգելիչ միջոցառումներ» թեմային։
Ֆորումը կեզրափակվի Համատեղ գործողությունների մասին Հռչակագրի ընդունմամբ՝ առաջադեմ տեխնոլոգիաների ներուժը ցեղասպանության եւ այլ դաժան հանցագործությունների նախազգուշացման եւ կանխարգելման համար օգտագործելու, ինչպես նաեւ դրանց չարարկման դեմ պայքարելու վերաբերյալ: